Дунё бўйича нефтга талабнинг энг юқори даражаси қачон қайд этилиши маълум қилинди

Жаҳонда нефтга бўлган талаб 2041 йилда энг юқори даражага етади. Бу ҳақда Халқаро валюта жамғармасининг ҳисоботида айтилди.

Қайд этилишича, 2041 йилга бориб кунлик талаб 115 миллион баррелга тенг бўлади, бугунги кунда эса у 100 миллион баррелга тенг. Энергия сарфи самарадорлигининг ошиши талаб даражасининг бундан юқорилашига имкон бермайди, деб тахмин қилмоқда ХВЖ.

Жамғарманинг фикрига кўра, талабнинг музлатилиши Форс кўрфазидаги араб давлатлари ҳамкорлик кенгашининг нефть экспорт қилувчи мамлакатлари — Саудия Арабистони, Қатар, БАА, Баҳрайн, Кувайт ва Уммонга кучли зарба бўлади.

2034 йилга бориб мазкур давлатлар икки триллион долларлик захираларини сарфлаб бўлиши мумкин, чунки ушбу мамлакатларнинг иқтисодиёти асосан углеводородларни экспортига йўналтирилган. Уларнинг даромади 2050 йилга бориб ЯИМнинг 23 фоизидан 10 фоизигача тушади. Халқаро валюта жамғармаси араб давлатларига тежамкор бюджет сиёсатига риоя қилишни, кенг кўламли иқтисодий ислоҳотларни ўтказишни ва иқтисодиётни диверсификация қилишни маслаҳат бермоқда.

Аввалроқ Wood Mackenzie консалтинг компанияси Хитойдан талаб пасайиши сабабли нефть нархи 2020 йил биринчи чорагида бир баррел учун 60 доллардан ошмаслигини прогноз қилган. Биринчи чоракда дунёда нефтга бўлган талаб коронавирус тарқалишига қарши курашиш доирасида авиақатновларнинг чекланиши сабабли кунига 900 минг баррелга пасайиб, 98,8 миллион баррелгача тушди.