Пекинда коронавирус ҳақида огоҳлантирган шифокорнинг ўлими туфайли текширув ўтказилади

Хитой коммунистик партияси марказий комиссияси тартиб-интизом масалаларини текшириш учун Ухань шаҳрига текширув гуруҳини юборди. Бу ҳақда CCTV хабар берган.

Текширув гуруҳи доктор Ли Венляннинг ўлими бўйича ҳар томонлама жиддий суриштирув ишларини олиб боради, дейилади хабарда.

2019 йил декабрида Ли Венлян биринчи бўлиб денгиз маҳсулотлари сотиладиган бозори ишчиларида номаълум вирусга чалиниш аломатлари борлигини аниқлаганди. У ушбу касалликнинг 2003 йилда тарқалиб, атипик пневмония ҳасталигини келтириб чиқарган САРС вируси бўлиши мумкинлигини тахмин қилган. Шифокор Weibo ижтимоий тармоғи орқали ушбу вазиятни ҳамкасблари билан муҳокама қилган.

Ушбу воқеадан кейин Венлян ва унинг ҳамкасблари полицияга чақирилган, улардан бу каби ахборотларни тарқатишни тўхтатиб жамоат тартибини бузганлик бўйича айбни ёзма равишда тан олиш талаб қилинган.

Шифокор ишига қайтгач, 10 январда унинг беморларидан бирида 2019-nCoV коронавируси аниқланган. Икки кун ўтгач Венляннинг ўзи ҳам шифохонага ётқизилган. У 7 февралга ўтар кечаси коронавирусдан кейинги асоратлар оқибатида вафот этган.

Хитой соғлиқни сақлаш миллий комиссиясининг маълумотига кўра, мамлакатда коронавирусдан вафот этганлар сони 636 кишига етган. Вафот этганларнинг катта қисми — 618 нафар одам Хубэй провинциясида жойлашган Ухань шаҳрига тўғри келмоқда. Умумий ҳисобда касалланганлар сони 31 минг нафардан ошган.