Ичида Россия Давлат думаси депутати Айрат Хайруллин бўлган Bell 407 вертолёти Қозон шаҳри яқинида фалокатга учради, деб хабар беради Бизнес Online.
Таъкидланишича, фалокат оқибатида Хайруллин ҳалок бўлган. Маsh’нинг ёзишича, вертолёт қолдиқлари остидан депутатнинг танасини чиқариб олишолмаган.
Вертолёт бортида бўлган яна икки киши жиддий жароҳат олган. Улардан бири учувчи бўлса, яна бири Хайруллиннинг ёрдамчиси. Улар ҳозирда шифохонада беҳуш ётибди.
Вертолётнинг фалокатга учрашига техник носозлик сабаб бўлган бўлиши мумкин. Айримлар бунга ноқулай об-ҳаво шароити сабаб бўлганлигини таъкидламоқда.
Хайруллин Татаристонга январь ойининг охирида думанинг минтақавий ҳафталиги доирасида келган эди. У кетма-кет тўрт чақириқдан буён думада ишлаб келади. 1990 йилларда Хайруллин бизнес билан шуғулланган, 2003 йилга қадар Қозондаги «Қизил Шарқ» пиво ишлаб чиқарувчи компанияга эгалик қилган. 2008 йилдан буён Хайруллин Сут ишлаб чиқариш миллий иттифоқи президенти ҳисобланади.
Изоҳ (0)