2019 йил якунларига кўра, Ўзбекистонда аҳоли масканларини мобил алоқа билан қамрови даражаси 96 фоизга ва мобил интернет тармоғига кенг полосали уланиш қамрови даражаси 70 фоизга етказилди. Бу ҳақда Ахборот технологиялари ва коммуникацияларини ривожлантириш вазирлиги маълум қилди.
Мобил алоқа тармоқларини ривожлантириш мақсадида 2 017 та мобил алоқа база станцияси ўрнатилиб, уларнинг умумий сони 26 мингтадан ортди.
2020 йилда республика бўйича 12 минг километр оптик толали алоқа линиялари қуриш ва 2 200 та мобил алоқа база станцияларини ўрнатиш белгилаб олинди.
Шунингдек, 2019 йилда «Оптик толали алоқа линияларини қуриш» лойиҳаси доирасида республика бўйича 10,0 минг километр оптик толали алоқа линиялари қурилиб, умумий узунлиги 36,6 минг километрга етказилди.
Халқаро Интернет тармоғига уланишнинг умумий ўтказувчанлик қобилияти 1 200 Гбит/секундни ташкил этиб, коммутация маркази орқали 750 Гбит/ссекунд тезликда Интернет тармоғига чиқиш имконияти яратилди ва тармоқнинг юкланиш даражаси 76,6 фоизни ташкил этди.
Республика бўйича 237 та объектда магистрал телекоммуникация тармоқлари кенгайтирилиб, телекоммуникация ускуналари модернизация қилиниб, магистрал телекоммуникация тармоқлари ўтказувчанлик қобилияти вилоятлараро даражада 200 Гбит/секундга, туманлараро даражада эса 40 Гбит/секундга етказилди.
Изоҳ (0)