Олий таълим вазирлиги «Олий таълим муассасалари талабаларига тўланадиган стипендиялар миқдорларини белгилаш ҳамда стипендиялар тайинлаш ва тўлаш тартибини такомиллаштириш тўғрисида»ги ҳукуматнинг қарори қабул қилинди. «Ҳуқуқий ахборот» каналининг ёзишича, беш ой давомида талабаларга тўланган стипендиядаги тафовутлар давлат бюджети маблағлари ҳисобидан қопланади.
Эслатиб ўтамиз, Ўзбекистонда 2019/2020-ўқув йилидан бошлаб давлат олий таълим муассасаларининг барча талабаларга бир хил — 400 минг сўм миқдорида стипендия белгиланиши мунозараларга сабаб бўлган. Хушнудбек Худойбердиев 2019 йил сентябридан бери талабаларга 400 минг сўм миқдорида бир хил стипендия тўланиши ноқонуний экани ҳақида ёзган эди.
Қарорга кўра, ОТМларда давлат гранти асосида таълим олаётган «аъло» (рейтинг кўрсаткичи – 86 балл ва ундан юқори) ҳамда «яхши» (рейтинг кўрсаткичи – 71 балл ва ундан юқори) ўзлаштирган талабаларга тажриба-синов тариқасида 2019 йил 1 сентябрдан 2020 йил 1 февралга қадар ҳақиқатда тўланган ҳамда ҳукуматнинг тегишли қарори асосида тўланиши лозим бўлган миқдорлар орасидаги тафовут тизимида ОТМлар бўлган вазирликлар ва идораларга 2020 йил учун ажратилган давлат бюджети маблағлари доирасида қопланади.
Шунингдек, 2019/2020-ўқув йилидан бошлаб тўлов-контракт асосида таълим олувчи номли давлат стипендиялари соҳиблари, 1 ва 2-гуруҳ ногиронлиги бўлган, тўлиқ давлат таъминотида бўлган етим болалар ва ота-она қарамоғидан маҳрум бўлган болалар сирасига кирувчи талабаларга стипендия тўловлари республика бюджети маблағлари ҳисобига амалга оширилишини инобатга олиб, уларга тегишли ўқув йили учун контракт қиймати миқдорини стипендиясиз шаклда тўлаш имконияти яратилади.
Мавзуга доир: Ўзбекистонда ҳукумат қарори билан талабаларга стипендия тўлашнинг янги тартиби жорий қилинди
Блогер Хушнудбек Худойбердиевнинг ёзишича, семестрни «3» баҳога ёпган талабаларга тўланган ортиқча стипендия қайтариб олинмайди, стипендияли контракт тўлашни танлаган ва «4» ёки «5» баҳога ёпган контрактдаги талабалар билан қайта ҳисоб-китоб қилинмайди.
Изоҳ (0)