Каттақўрғон тумани «Муллатоғай» маҳалласи ҳудудида жойлашган «Х.Э.З.» фермер хўжалиги раиси Э.Х хўжалик ер майдонидан фуқароларга уй-жой қуриш учун ер ажратиб бериш ваколатига эга бўлмаса ҳам, 2008—2019 йиллар давомида шу иш билан шуғулланиб келган.
Жиноят ишлари бўйича Самарқанд вилоят суди судьяси Ғайрат Негматовнинг «Дарё»га маълум қилишича, Э.Х. 2016 йилнинг ноябрь ойида ҳамқишлоғи Б.Нағматовни алдаб, унга «Х.Э.З.» фермер хўжалигига тегишли ердан уй-жой қуриш учун 0,10 гектар ер ажратиб беришни ваъда қилган.
Келгусида туман кадастрида ишловчи мансабдор танишлари орқали ушбу ерни фермер хўжалиги балансидан чиқариш ҳақидаги туман ҳокимининг қарорини чиқартириб беришини билдирган. Б.Нағматовнинг отасидан 800 АҚШ доллари миқоридаги пулларни алдаш йўли билан қўлга киритган.
Бундан ташқари, 2017 йилнинг сентябрь ойида фуқаро А.Ғафуровдан ҳам уй-жой қуриш учун ер ажратиб бериш ваъдаси эвазига 1000 АҚШ долларини қўлга киритган.
Жиноят ишлари бўйича Каттақўрғон туман суди раиси Темур Алмаматов раислигида ўтаётган суд мажлисида Э.Х.га нисбатан Жиноят кодексининг тегишли моддалари билан қўзғатилган жиноий иш материаллари кўриб чиқилмоқда.
Изоҳ (0)