Besh oy davomida “a’lo” va “yaxshi” o‘qigan talabalarning stipendiyasidagi tafovut davlat budjeti hisobidan qoplanadigan bo‘ldi

Oliy ta’lim vazirligi “Oliy ta’lim muassasalari talabalariga to‘lanadigan stipendiyalar miqdorlarini belgilash hamda stipendiyalar tayinlash va to‘lash tartibini takomillashtirish to‘g‘risida”gi hukumatning qarori qabul qilindi. “Huquqiy axborot” kanalining yozishicha, besh oy davomida talabalarga to‘langan stipendiyadagi tafovutlar davlat budjeti mablag‘lari hisobidan qoplanadi.

Eslatib o‘tamiz, O‘zbekistonda 2019/2020-o‘quv yilidan boshlab davlat oliy ta’lim muassasalarining barcha talabalarga bir xil — 400 ming so‘m miqdorida stipendiya belgilanishi munozaralarga sabab bo‘lgan. Xushnudbek Xudoyberdiyev 2019-yil sentabridan beri talabalarga 400 ming so‘m miqdorida bir xil stipendiya to‘lanishi noqonuniy ekani haqida yozgan edi.

Qarorga ko‘ra, OTMlarda davlat granti asosida ta’lim olayotgan “a’lo” (reyting ko‘rsatkichi – 86 ball va undan yuqori) hamda “yaxshi” (reyting ko‘rsatkichi – 71 ball va undan yuqori) o‘zlashtirgan talabalarga tajriba-sinov tariqasida 2019-yil 1-sentabrdan 2020-yil 1-fevralga qadar haqiqatda to‘langan hamda hukumatning tegishli qarori asosida to‘lanishi lozim bo‘lgan miqdorlar orasidagi tafovut tizimida OTMlar bo‘lgan vazirliklar va idoralarga 2020-yil uchun ajratilgan davlat budjeti mablag‘lari doirasida qoplanadi.

Shuningdek, 2019/2020-o‘quv yilidan boshlab to‘lov-kontrakt asosida ta’lim oluvchi nomli davlat stipendiyalari sohiblari, 1 va 2-guruh nogironligi bo‘lgan, to‘liq davlat ta’minotida bo‘lgan yetim bolalar va ota-ona qaramog‘idan mahrum bo‘lgan bolalar sirasiga kiruvchi talabalarga stipendiya to‘lovlari respublika budjeti mablag‘lari hisobiga amalga oshirilishini inobatga olib, ularga tegishli o‘quv yili uchun kontrakt qiymati miqdorini stipendiyasiz shaklda to‘lash imkoniyati yaratiladi.

Bloger Xushnudbek Xudoyberdiyevning yozishicha, semestrni “3” bahoga yopgan talabalarga to‘langan ortiqcha stipendiya qaytarib olinmaydi, stipendiyali kontrakt to‘lashni tanlagan va “4” yoki “5” bahoga yopgan kontraktdagi talabalar bilan qayta hisob-kitob qilinmaydi.