Йил бошидан буён миснинг дунё бозоридаги нархи кескин пастлаб ўтган йил сентябрь ойидаги каби 12 фоизгача арзонлашган. Охирги кунлардаги савдолар натижаларига кўра, нархлар 13 кун давомида пастлаб борган. Мис нархи ушбу саноат металлининг энг йирик импорт қилувчиси ҳисобланган Хитойда мисга нисбатан талабнинг қисқариб бораётгани туфайли арзонлашган, деб ёзмоқда «Коммерсантъ». Хитойда мисдан электроника маҳсулотлари ишлаб чиқариш, транспорт, машинасозлик ва қурилишда фойдаланилади.
Экспертлар мис билан боғлиқ вазият иқтисодиёт ҳолатини аниқлашнинг мезонларидан бири эканини қайд этган.
«Мис ишлаб чиқариш соҳасига кучли таъсир кўрсатади. Ўтган йилги савдо низоларидан кейин ушбу вазият дунё иқтисодиёти учун яна бир оғриқлик нуқта бўлиши мумкин»,— дея таъкидлаган CNBC телеканалига берган интервьюсида Charles Schwab таҳлилчиси Жефри Клянтоп.
Аввалроқ Moody’s рейтинг агентлиги металл ишлаб чиқариш динамикасини таҳлил қилиб Хитойда коронавируснинг тарқалиши дунё иқтисодиётига 2008–2009 йилларда кузатилган жаҳон молиявий иқтисодий инқирозидан ҳам кучлироқ зиён етказиши мумкинлиги ҳақида хавотирлар мавжудлиги ҳақида ёзган.
Изоҳ (0)