Жаҳон соғлиқни сақлаш ташкилоти 2019-nCoV коронавируси тарқалиши уни пандемия, яъни дунё миқёсидаги кучли эпидемия деб тан оладиган даражага етмаганини билдирди, деб ёзмоқда «РБК».
ЖССТнинг пандемик ва эпидемик касалликлар бўлими бошлиғи Сильвия Бриан матбуот анжуманида пандемия ҳақида гапиришга ҳали эрта экани, коронавирусни кўплаб ўчоқларга эга эпидемия деб аташ тўғрилиги, ушбу ўчоқларнинг ҳар бирини йўқотишга ҳаракат қилинаётганини таъкидлаган.
3 февраль, душанба куни, ЖССТ бош директори Тедрос Гебрейесус дунё «глобал миқёсдаги хавфли пандемияга тайёр эмаслигини» айтганди.
«Дунё узоқ вақт давомида цикл тарзида талвасадан бепарволик томон ҳаракатланиб яшади. Касалликнинг тарқалишига қарши курашга пулларни совурамиз, бироқ уни енггач барчасини эсдан чиқариб, келажакда келиши мумкин бўлган бошқа бир касалликнинг олдини олиш учун ҳеч нима қилмаймиз. Бундай калтабинлик хавфли ва очиғини айтсам, бироз тушунарсиз. Яхши тайёргарлик кўрмасак, муваффақиятсизликка юз тутамиз», — дея огоҳлантирганди ташкилот раҳбари.
30 январда ЖССТ фавқулодда йиғилишида Хитойдаги коронавирусни халқаро миқёсдаги фавқулодда ҳолат деб эълон қилган. Мутахассислар 20 дан кўпроқ давлатда қайд қилинган 2019-nCoV коронавирусининг тарқалиши тобора пандемияни эслатиб юбораётганидан огоҳлантирмоқда.XXI асрдаги биринчи пандемия 2009 йилда чўчқа гриппи А (H1N1) тарқалиши бўлган. ЖССТ маълумотига кўра, ушбу касалликдан вафот этганлар сони 100 мингдан 400 минггачани ташкил қилган. 2010 йил август ойида ЖССТ раҳбарияти ушбу пандемия тўхтаганини эълон қилган.
Мавзуга доир: ЖССТнинг Ўзбекистондаги ваколатхонаси раҳбари: Коронавирус иммунитети паст беморларда оғир кечади
4 февраль, сешанба куни, Хитойнинг коронавирус ўчоғи бўлган Ухань шаҳрида янги касалхона беморларни қабул қилишни бошлади. 1000 нафар беморга мўлжалланган касалхона биноси модул конструксияларидан фойдаланган ҳолда 10 кунда қуриб битказилганди. Уханда шу технологияни қўллаган ҳолда иккинчи касалхона қурилиши бошланган.
Изоҳ (0)