Буюк Британия 1 февралга ўтар кечаси 47 йиллик аъзоликдан сўнг Европа Иттифоқини тарк этди. Ўзбекистон Ташқи ишлар вазирлиги шу муносабат билан махсус ахборот берди.
«Европа Иттифоқининг расман билдиришича, Буюк Британиянинг ЕИ таркибидан чиқиши муносабати билан Евроиттифоқ қонунчилиги ҳамда учинчи давлатлар билан тузилган халқаро шартномалар Буюк Британияга нисбатан ўтиш даври мобайнида (2020 йилнинг 1 февралидан 31 декабригача) аввалгидек кучда қолади.
Ўзбекистон ўтиш даври якунлангунича Буюк Британияни Ўзбекистон Республикаси ва Евроиттифоқ ўртасида имзоланган барча халқаро шартномаларни, жумладан, 1996 йил 21 июндаги Шерикчилик ва ҳамкорлик тўғрисидаги битимни бажариш нуқтаи назаридан ЕИнинг аъзо давлати сифатида билади», — дейилади ТИВ ахборотида.
Эслатиб ўтамиз, Буюк Британиянинг Европа Иттифоқидан чиқиши дастлаб 2019 йилнинг март ойига мўлжалланган эди, бироқ парламент ва ҳукумат ўртасида якдил қарорга келинмагани сабаб бир неча бор қолдирилган.
Изоҳ (0)