Бугун дунёга машҳур қўшиқчи Шакира 43 ёшга тўлди. Шакира Изабель Мебарак Рипол 1977 йилда, Колумбиянинг Барранкиля шаҳрида таваллуд топган. Қўшиқчи отасининг биринчи турмушидан 8 нафар фарзанди бўлган ва унинг келиб чиқиши Ливандан Нью-Йоркка кўчиб келган мигрантлардан ҳисобланади. Онасида эса испан, италян қони бор.
Бўлажак юлдуз, болалигидаёқ ҳарфларни таниб, она тилида ўқий ва ёза олган. 4 ёшлигида шеър ёзган, шунингдек рақс билан шуғулланган.
Яқинлари томонидан келажакда ёзувчи, рассом ёки раққоса бўлса керак деб тахмин қилинган қўнғироқсоч қизалоқ, қўшиқчи бўлишни танлаган. Лекин болалигидаги қизиқишлари унинг санъатида акс этмай қолмаган. У биргина қўшиқлар ижро этмади, уларнинг матнини ҳам ўзи ёзди қолаверса, саҳнадаги позитив кайфият улашувчи рақслари билан миллионлаб инсонлар қалбини забт этди.
Унинг санъатга қадам қўйишида иштирок этган танловлари аҳамиятли бўлди. 1990 йилда ёш Шакира маҳаллий истеъдодлар танловида театр журналисти Моника Аризо билан танишиб қолган ва айнан шу тасодифий учрашув унинг карьерасидаги муваффақиятга сабаб бўлган, яъни Sony Music компаниясининг Колумбиядаги бўлими билан шартнома имзолаган.
1994 йил мактабни битиргач, ўзини актриса сифатида синаб кўради ҳамда «El Oasis» мелодрама жанридаги сериалда рол ўйнайди. Бош қаҳрамон ижроси учун, Колумбиянинг TV GUIA журнали уни «Miss TVK» деб атаб, бўлажак юлдуз учун суратга тушишни уюштиради.
Шакиранинг рэпертуаридан ўрин олган аксарият қўшиқлар хит даражасига кўтарилиб, мухлислар эътирофига сазовор бўлади. 1995 йилда Шакира Nuestro Rock пластинкаси учун махсус «Donde Estas Corazon» қўшиғини ёзади. 1996 йилда мухлисларга тақдим этилган пластинка, унинг биринчи расмий студиядаги лойиҳаси бўлган. Альбомнинг бюджети 100 минг долларни ташкил қилган. Дунёнинг турли бурчаклари хусусан, Бразилия, Аргентина, Колумбия, Чили, Эквадор, Перу ва Венесуэлада тез муддатда сотилган.
Шакира ижодни бошлаган йилларидаёқ халқаро даражадаги хитлар яратган. Мусиқий танқидчилар колумбиялик ёш қўшиқчи ижодини ижобий баҳолаган. 1997 йилда унинг альбоми Billboard Latin Music Awards’да 2 йўналишдаги мукофотга лойиқ топилган.
1999 йилда Шакира «Энг яхши Лотин Америка рок ижрочиси» сифатида Грэмми мукофоти, MTV Unplugged альбоми эса 5 марта 2 йўналишда мукофот билан тақдирланган.
Халқаро даражада ҳам ўзини синаб кўриш мақсадида у инглиз тилида ҳам қўшиқлар ёза бошлаган. Биргина «Whenever, Wherever» синглининг ўзи хит-парадлардан тушмаган. 2001 йилда Laundry Service номли инглиз тилидаги қўшиқлардан иборат альбом мухлисларга тақдим этилган. Тингловчилар томонидан илиқ қабул қилинганига қарамай, альбомни кинотанқидчилар «америкача» услубдаги поп-мусиқага ортиқча тақлид шунингдек, испанча ўзига хослик йўқ деб фикр билдирган.
2005 йилда чиққан испан тилидаги «Fijación Oral, Vol. 1» альбоми 4 миллион нусхада сотилган. 2007 йилда Бейонсе билан биргаликдаги Beautiful Liar дуэти Billboard Hot-100 чатида рекорд натижа қайд қилган ва «Энг яхши биргаликдаги поп-вокал ижро» деб топилган. 2010 йилда Жанубий Африкадаги футбол Жаҳон чемпионати учун куйлаган Waka Waka (This time for Africa) қўшиғи дунё хит-парадидан анчагача тушмаган. 2014 йилда Бразилияда бўлиб ўтган футбол Жаҳон чемпионатининг ёпилиш маросимида «La la la» қўшиғини ижро қилган.
Шакира болалигида, шаҳар боғларида уйсиз, ота-онасиз болаларни кўриб, катта бўлса хайрия ишларини амалга оширишга қатъий қарор қилган. Болаликдаги вадасига мувофиқ, 1997 йили Pies Descalzos Foundation деб номланган болалар хайрия фондига асос солган. Фонд Колумбия ҳудудида, болаларга таълим берадиган ва озиқ-овқат билан таъминлайдиган 5 та мактабга асос солган. 2003 йилда қўшиқчининг биографиясида хайрли лойиҳалар сони яна бир мартага кўпайди, Шакира UNICEF’нинг хайрия ишлари бўйича расмий вакили бўлди.
2000 йилда Шакира адвокат Antonio de la Rua билан шахсий муносабатда бўлган бироқ, 2011 йилда жуфтлик муносабатларига нуқта қўйган. 2010 йилдаги футбол жаҳон чемпионати учун Waka Waka клипини суратга олиш жараёнида эса қўшиқчи бўлажак турмуш ўртоғи Жерар Пике билан танишган. Жуфтлик 2013 йилда ота-она бўлган ва уларнинг фарзанди 2015 йилда яна биттага кўпайган.
Изоҳ (0)