Энергетика вазирлиги мамлакатнинг энг йирик хорижий сармоядорига айланган Россиянинг «Лукойл» компанияси билан ҳамкорликни амалга оширишдан Ўзбекистоннинг умумий даромади 4 миллиард доллардан ошганини маълум қилди.
Қайд этилишича, «Лукойл Узбекистан Оперейтинг Компани» МЧЖ «Ўзбекнефтьгаз» АЖ билан биргаликда ташкил этилган бўлиб, қудуқларни ўзлаштириш ва жиҳозлаш, табиий газни қазиб олиш, уни бозор талабларига жавоб берадиган ҳолгача тозалаш ва қайта ишлаш бўйича фақат лойиҳалар оператори ҳисобланади. «Лукойл» томонидан ўзбек тупроғида ишлаб чиқарилган газнинг бутун ҳажми Ўзбекистонга топширилади.
Бундан ташқари, «Лукойл» республикадаги энг йирик солиқ тўловчилардан бири бўлиб, давлат ғазнасига фойда солиғи, ерости бойликларидан фойдаланганлик учун солиқ ва бошқа мажбурий тўловларни тўлайди. «Лукойл»нинг Ўзбекистондаги бутун фаолияти давомида солиқ ажратмаларининг умумий миқдори 10,2 триллион сўмни ташкил этди.
Ҳозирги вақтда «Лукойл» етиб бориш қийин бўлган ҳудудларда газ қазиб олмоқда ва қайта ишламоқда. Чўлда замонавий муҳандислик ва транспорт инфратузилмасига эга бўлган, қуввати 8 миллиард кубометрдан ортиқ бўлган ноёб «Қандим» газни қайта ишлаш мажмуаси барпо этилган.
«Лукойл» объектларида 3000 дан ортиқ ўзбекистонликлар иш билан таъминланган.
Эслатиб ўтамиз, Ўзбекистон ва Россиянинг «Лукойл» нефть компанияси ўртасида ҳамкорлик 15 йил олдин Қашқадарё ва Бухоро вилоятлари конларидаги маҳсулот тақсимотига оид битимлар имзоланиши билан бошланган.
Изоҳ (0)