Алишер Шодмонов: Хитой фуқароларининг Ўзбекистонга кириб келишини вақтинчалик чеклаш тарафдориман

Ўзбекистон соғлиқни сақлаш вазири Алишер Шодмонов коронавирус сабаб Ўзбекистонда хитойликлар учун виза чеклови ўрнатилиши масаласида ўз фикрини билдирди. Бу ҳақда Соғлиқни сақлаш вазирлиги хабар берди.

Вазирлик томонидан таъкидланишича, янги турдаги коронавируснинг тарқалиши натижасида кўплаб давлатлар эҳтиёт чораси сифатида Хитой билан чегарани ёпди. Яна қатор давлатлар Хитой фуқароларига нисбатан виза чекловларини жорий этди. Соғлиқни сақлаш вазири Алишер Шодмонов Ўзбекистон бундай вазиятда қандай йўл тутиши бўйича ўз фикрларини маълум қилган.

Мазкур коронавирусга қарши кураш доирасида биз нафақат Хитойдан келувчилар, балки барча йўналишлардан давлатимиз ҳудудига кириб келувчи йўловчиларни қатъий назоратдан ўтказяпмиз. Чегара пунктлари тепловизорлар билан жиҳозланган, вирус ташиши мумкин бўлган маҳсулотлар жиддий текширувдан ўтказилади. Айнан вирус тарқалгани қайд этилган ҳудудлардан ташриф буюрувчилар ва касалликнинг ҳар қандай белгиси кузатилган фуқаролар алоҳида назоратга олинади. Юқумли касалликлар шифохоналарида ҳудудга кўра алоҳида ўринларни шай ҳолда тайёрлаб қўйганмиз, зарур дори-дармон захиралари яратилган.

Энди чегарани ёпиш масаласига келсак, бу чорани қўллаш вазирлигимиз ваколатида эмас. Аммо бу борада ўз фикримни айтадиган бўлсам, айни пайтда, яъни 30 январь ҳолатига кўра мамлакатимиз ҳудудида бундай касалликка чалиниш ҳолати бирорта ҳам кузатилмаганлигига қарамасдан эҳтиёт чораларини кўришимиз лозим. Шахсан ўзим юртимиз фуқароларининг Хитойга боришини чеклаш билан бир қаторда, хитойликлар ва бошқа хорижий давлатлар фуқароларининг ушбу мамлакатдан юртимизга кириб келишини вақтинчалик чеклаш тарафдориман. Чунки, ушбу вируснинг ҳаво-томчи йўли билан ўтиши, одамдан одамга юқиши, бундан ташқари, касаллик белгиларининг яширин даври 14 кун давом этиши касаллик тарқалиш хавфини кескин оширади.

Қолаверса, ҳатто тиббиёти ривожланган АҚШ, қатор Европа давлатлари, Осиёнинг тараққий этган мамлакатларида ҳам бу касаллик кузатилаётганлиги вазиятнинг нақадар жиддийлигини кўрсатиб турибди.

Алишер Шодмонов, Ўзбекистон соғлиқни сақлаш вазири

Аввалроқ Ўзбекистон Сенати Хитойнинг мураккаб эпидемик вазият ҳукм сураётган ҳудудида 72 нафар ўзбекистонлик талаба мавжудлигини маълум қилган эди.

28 январь, сешанба куни Ўзбекистон бош вазири Абдулла Арипов мамлакатга Хитойда тарқалган янги турдаги коронавирус кириб келишининг олдини олиш масалаларига бағишланган йиғилиш ўтказган.

Аввалроқ Ўзбекистон соғлиқни сақлаш вазирининг биринчи ўринбосари Баҳодир Юсупалиев коронавируснинг Ўзбекистонга кириб келишининг олдини олиш бўйича қилинаётган ишлар хусусида маълумот берган эди.

Шунингдек, Соғлиқни сақлаш вазирлиги коронавируснинг Ўзбекистонга кириб келгани ҳақидаги гап-сўзларни инкор этган эди.

Ўзбекистон Ташқи ишлар вазирлиги фуқароларга Хитойга хизмат, туристик ва бошқа мақсадларда ташриф буюришдан тийилиб туришни тавсия қилган эди.

Эпидемия тарқалишининг олдини олиш учун Қозоғистон, Қирғизистон, Россия, Мўғулистон ва Малайзия Хитой билан чегарасини ёпди. Қозоғистон ва Филиппин хитойликларга виза беришни тўхтатди. КХДР Хитойдан келган хорижликлар учун бир ой муддатли карантин жорий этди.