Facebook фойдаланувчиларнинг ҳатто сайтдан ташқаридаги маълумотларини йиғишини ошкор қилди. Уларни ўчириш мумкин

Facebook фойдаланувчилар ҳақида қандай маълумотларни йиғишини ошкор қилди, деб хабар бермоқда «Ведомости».

Бугун, 28 январь куни ушбу ижтимоий тармоқда Ёур Facebook информатион («Сизнинг Facebook’даги маълумотларингиз») номли қўшимча тугма киритилди. Унда фойдаланувчи қандай сайтларга ташриф буюргани ва қандай иловаларни ишлатгани ҳақида маълумотлар жамланган.

Қайд этилишича, Facebook бу маълумотларни фойдаланувчи ҳатто аккаунтига кирмаганда ҳам йиғади. «Тарихни тозалаш» тугмаси орқали уларни ўчириб ташлаш мумкин, лекин бу Facebook’нинг бундай маълумотларни кейинчалик ҳам йиғишини чекламайди.

Washington Post’нинг таъкидлашича, Facebook шунингдек, шахсий ҳаётига тегишли сайтларга, масалан, суғурта агентликлари ва бепуштликни даволаш клиникаларига киргани тўғрисидаги маълумотларни ҳам сақлайди.

Компания бундай маълумотларни сайтлар ва иловаларга ўрнатиладиган трекерлар ёрдамида йиғади. Facebook’чилар трекерлардан фойдаланувчи қайси саҳифаларга кириши ва қандай иловалардан фойдаланишини баҳолаш учун фойдаланади.

Facebook, ўз навбатида, бу маълумотлардан рекламаларни тўғри йўналтириш учун фойдаланади. Трекерлар 10 мингта энг машҳур сайтларнинг 30 фоизига ўрнатилган.