Facebook foydalanuvchilar haqida qanday ma’lumotlarni yig‘ishini oshkor qildi, deb xabar bermoqda “Vedomosti”.

Foto: Sputnik

Bugun, 28-yanvar kuni ushbu ijtimoiy tarmoqda Your Facebook information (“Sizning Facebook’dagi ma’lumotlaringiz”) nomli qo‘shimcha tugma kiritildi. Unda foydalanuvchi qanday saytlarga tashrif buyurgani va qanday ilovalarni ishlatgani haqida ma’lumotlar jamlangan.

Qayd etilishicha, Facebook bu ma’lumotlarni foydalanuvchi hatto akkauntiga kirmaganda ham yig‘adi. “Tarixni tozalash” tugmasi orqali ularni o‘chirib tashlash mumkin, lekin bu Facebook’ning bunday ma’lumotlarni keyinchalik ham yig‘ishini cheklamaydi.

Washington Post’ning ta’kidlashicha, Facebook shuningdek, shaxsiy hayotiga tegishli saytlarga, masalan, sug‘urta agentliklari va bepushtlikni davolash klinikalariga kirgani to‘g‘risidagi ma’lumotlarni ham saqlaydi.

Kompaniya bunday ma’lumotlarni saytlar va ilovalarga o‘rnatiladigan trekerlar yordamida yig‘adi. Facebook’chilar trekerlardan foydalanuvchi qaysi sahifalarga kirishi va qanday ilovalardan foydalanishini baholash uchun foydalanadi.

Facebook, o‘z navbatida, bu ma’lumotlardan reklamalarni to‘g‘ri yo‘naltirish uchun foydalanadi. Trekerlar 10 mingta eng mashhur saytlarning 30 foiziga o‘rnatilgan.