Хитойда фаолият юритувчи АҚШ ва Европа етакчи компаниялари коронавирус инфекцияси эпидемиясига қарши курашда молиявий ёрдам беришни бошлади. «Коммерсантъ»нинг Financial Times’га асосланиб хабар беришича, мамлакатда фаолият юритаётган кўп миллатли корпорациялар инфекцияга қарши курашаётган ташкилотларга жами 10 миллион юан (тахминан 1,4 миллион доллар) юборишга ваъда берди.
Хусусан, Dell вирусга қарши курашиш учун 2 миллион юанни беришни ваъда қилди, Cargill корпорацияси ҳам худди шунча пулни Хитой Қизил Хочга ўтказади. Microsoft 1 миллион юан миқдорида ёрдам кўрсатмоқчи. Компания бу пуллар Ухань ва Хубэй провинциясида қутқарув операцияларини қўллаб-қувватлашга ҳамда тиббий буюмлар ва биринчи даражали зарурий маҳсулотлар билан таъминлашга сарфланишини таъкидлаб, маблағларнинг аниқ олувчисини кўрсатмаган.
Билл Гейтс ва Мелинда Гейтс фонди эса Хитойдаги коронавирус билан курашишга компаниядан алоҳида равишда 5 миллион доллар ажратди.
Шунингдек, PepsiCо, Procter & Gamble, Европа компаниялари орасидан эса Michelin, Bayer ва L’Oreal компаниялари коронавирусга қарши курашда ёрдам беришни ваъда қилган.Америка ва Европа компаниялари кўрсатаётган ёрдам миқдори хитойлик корпорациялар томонидан (Tencent, Alibaba, Lenovo, Xiaomi ва бошқалар пул ёки тиббий материаллар билан ёрдам беришини айтган) тақдим этилган ёрдамдан сезиларли даражада юқори эканлиги таъкидламоқда. Шунга қарамай Financial Times’нинг қайд этишича, бундай ёрдам ҳатто савдо уруши шароитида ҳам корпорацияларнинг Хитойга қанчалик ён босишини акс эттиради.
Изоҳ (0)