Пекин бозорни назорат қилиш ва тартибга солиш бошқармаси мамлакатда коронавирус тарқалиши муносабати билан тиббиёт ниқобининг нархини оширган дорихоналардан бирига уч миллион юан, яъни 432 минг доллар жарима солди, деб хабар берди «РИА Новости».
Бошқарма 23 январдан бошлаб медикаментлар, озиқ-овқат маҳсулотлари, ҳимоя воситалари, жумладан, ниқоблар, дезинфекция воситаларининг нархини сунъий равишда ошириш, нарх сиёсатини бузиш ҳолатларини аниқлаш юзасидан текширувлар ўтказмоқда.
23 январдан ҳозирга қадар нарх сиёсатини бузганлик билан боғлиқ 31 та иш қўзғатилган, улардан 15 таси 28 январь куни қайд этилган.
Фэнтай туманидаги «Jimin Kangtai» дорихонаси тиббиёт ниқобининг нархини олти бараваргача оширгани аниқланди. Бошқарма дорихонага уч миллион юан миқдорида жаримага тортилиши ҳақида хабарнома жўнатган.
Пойтахт маъмурияти аҳолидан огоҳ бўлишни, агарда дўкон ва дорихоналарда нархлар оширилганининг гувоҳи бўлса, тегишли ташкилотларига мурожаат қилишни сўрамоқда.
Ўтган ҳафта бошидан буён Хитой пойтахтининг дўконлари ва дорихоналарида вирусга қарши препаратлар билан бирга ҳимоя ниқоблари ҳам тугаб қолгани кузатилди.
Пекинда янги турдаги коронавирус инфекцияси билан касалланиш ҳолатлари аниқланганидан кейин одамлар ниқобларни кўп миқдорда сотиб олишни бошлади. Умумий ваҳима фонида баъзи тадбиркорлар нархларни кўтариш орқали талаб ортган маҳсулот устидан қўшимча пул топишга қарор қилди, аммо расмийлар бу ҳаракатларга тезда жавоб қайтарди.
Маълумот учун, бугунги кунда Хитойда коронавирус билан касалланганлар сони олти мингдан ортиб кетди.
Изоҳ (0)