Япония ҳукумати 29 ва 30 январь кунлари коронавирус қайд этилган Ухань шаҳрига яна иккита чартер рейс жўнатиб, ўз фуқароларини эвакуация қилади, деб хабар берди «ТАСС».
Аввалроқ мамлакат ҳукумати All Nippon Airways авиакомпанияси самолётини юборишга тайёрлигини билдирган эди.
Бортида 206 нафар Япония фуқароси бўлган самолёт бугун, 29 январь куни, Токиодаги Ханде аэропортига қўнди.
Дастлабки маълумотларга кўра, бортдаги йўловчилар текширувдан ўтказилганда уларда касаллик аломатлари аниқланмаган.
Шу билан бирга, тўрт киши ўзини ёмон ҳис қилаётгани, иссиғи баландлиги ва йўталаётганидан шикоят қилган.
Уларнинг барчаси юқумли касалликларга чалинган беморларни ташиш учун мўлжалланган махсус тез тиббий ёрдам машиналарида касалхонага кейинги текширув учун юборилди.
Қолган йўловчилар автобусларда Синдзюку туманидаги тиббиёт марказига қўшимча текширув ўтказиш учун олиб кетилди. Касалхонага ётқизиш зарурати бўлмаса, одамларга икки ҳафта давомида уйда қолишлари, агар соғлиғи ёмонлашса, дарҳол шифокор билан маслаҳатлашиш тавсия этилди. Самолёт салони бутунлай дезинфекция қилинади.
«Ҳозирда Ухань шаҳрида эвакуация қилинишни истаган 440 нафар Япония фуқароси бор. Биз уларни Японияга тезда жўнатиш учун барча зарур чораларни кўрамиз", — деди Вазирлар маҳкамаси бош котиби Ёсиҳидэ Суга Токиода бўлиб ўтган матбуот анжуманида.
Қайд этилишича, уларни эвакуация қилиш учун нафақат чартер рейслари, балки ҳукумат самолётлари ҳам жалб қилиниши мумкин.
Изоҳ (0)