Эстония парламенти ота-онаси мустақилликка эришилгунига қадар мамлакатда яшаган фарзандларга соддалаштирилган тартибда фуқаролик олиш имкониятини берувчи қонун лойиҳасини маъқуллади. 101 нафар депутатнинг 64 таси ҳужжатни ёқлаб овоз берган, 26 депутат ушбу лойиҳани маъқулламаган. Бу ҳақда «Коммерсантъ» хабар қилди.
Соддалаштирилган тартибда фуқаролик олиш имкониятидан ота-онаси «кул ранг», яъни фуқаролиги йўқ шахс ҳужжатига эга оилаларнинг фарзандлари, шунингдек, отаси ёки онаси, бувиси ё буваси «кул ранг паспорт»га эга ва мамлакатда 1991 йил 20 августидан аввал яшаган ёшлар, шу билан бирга, отаси ёхуд онаси бошқа давлат фуқароси ҳисобланувчи йигит-қизлар фойдаланиши мумкин.
Мамлакатда, асосан, Собиқ Иттифоқ даврида Эстонияга бориб қолган фуқаролар «кул ранг паспорт»га эга, улар иттифоқ парчаланганидан кейин на Эстония ва на Россия фуқаролигини олмаган. Бундай одамлар хорижликларга бериладиган паспорт билан яшайди ва ундан мамлакат ҳудудида, шунингдек, хорижга чиққанда ҳам фойдалана олади.
Изоҳ (0)