Нидерландиянинг Royal Philips компанияси ўзининг Philips бренди остида маиший техника маҳсулотларини ишлаб чиқариш бўлинмасини сотишни режалаштирмоқда. Бу ҳақда Meduza хабар берди.
Компаниянинг сайтида хабар қилинишича, бўлинма Royal Philips таркибидан 12—18 ой ичида чиқарилади. Кейин ишлаб чиқарувчи бизнесни ривожлантириш мақсадида янги тузилма учун яхши жой топишни режалаштирмоқда. Компания маиший техникаларининг 2019 йилдаги савдоси ҳажми 2,3 миллиард еврони ташкил этган.
Маълум қилинишича. келгусида Philips соғлиқни сақлаш соҳасидаги бизнесга эътибор қаратмоқчи.
Қайд этилишича, 28 январь куни компания 2019 йилнинг тўртинчи чораги бўйича ҳисобот берганидан кейин Philips акциялари 3 фоизга тушиб кетган. Компания савдоси уч фоизга ўсиб, олти миллиард еврога етган бўлиб, бу таҳлилчилар тахмин қилганидан камроқни ташкил этган.
Philips 2020 йилда сотувлар ҳажмининг 4—6 фоизга ўсишини прогноз қилмоқда, аммо йил бошида Хитойда янги коронавируснинг пайдо бўлиши сабабли ўсиш секинлашади. Хитой ҳукуматининг вирусга қарши ҳаракатлари сабабли саккиз минг нафар ишчининг кўпчилиги ишга чиқмаган.
Изоҳ (0)