Ўзбекистонга 27 январь—6 февраль кунлари Cotton Campaign халқаро коалицияси вакиллари ташриф буюради, деб хабар бермоқда Бандлик ва меҳнат муносабатлари вазирлиги матбуот хизмати.
Делегация таркибидан дунёга машҳур (Nike, Zara, GAP, Levi’s, H&M, UNIQLO ва ҳ.к.) ишлаб чиқарувчилар вакиллари, ритейлер ҳамда касаба уюшмалари, ҳуқуқни муҳофаза қилувчи ташкилотлар, АҚШ мода саноати ассоциацияси, АҚШ меҳнат федерацияси ҳамда қатор бошқа ташкилотлар ўрин олган.
ТИВ матбуот хизматининг хабарига кўра, ташриф давомида халқаро коалиция вакиллари Бандлик ва меҳнат муносабатлари вазирлиги, Меҳнат вазирлиги, Қишлоқ хўжалиги вазирлиги, Инвестиция ва ташқи савдо вазирлиги, Адлия вазирлиги, «Ўзтекстильпром» уюшмаси ҳамда қатор ташкилот ва идора раҳбарлари билан учрашади.
Шунингдек, Одам савдоси ва мажбурий меҳнатга қарши курашиш бўйича миллий комиссия раиси ва Олий Мажлис Сенати раиси Танзила Норбоева билан алоҳида учрашув режалаштирилган.
Cotton Campaign — бу меҳнат ва ҳуқуқни муҳофаза қилувчи, инвестор ва бизнес-ташкилотларининг халқаро коалицияси бўлиб, унинг мақсади пахта етиштириш жараёнини болалар меҳнати ҳамда мажбурий меҳнатдан буткул ҳоли этишдир.
Халқаро коалиция вакиллари ташрифи арафасида Бандлик ва меҳнат муносабатлари вазирлиги 2019 йилги пахта йиғим-терими мавсуми давомида мажбурий меҳнатга йўл қўйгани сабабли маъмурий жаримага тортилган мансабдор шахслар рўйхатини эълон қилди.
Рўйхатдан жами 43 нафар мансабдор шахс ўрин олган бўлиб, уларнинг 2 нафари ҳоким, 5 нафари ҳоким ўринбосаридир. Шунингдек, жавобгарликка тортилганлар орасида банкларнинг ҳудудлардаги 15 та филиали бошқарувчилари, тиббиёт биралашмаси, солиқ инспекцияси, мактаб раҳбарлари ҳам бор. Ундирилган жарималарнинг умумий миқдори 772 миллион сўмни ташкил қилган.
Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис, Ўзбекистон пахтаси халқаро жамоатчилик томонидан «қора рўйхатлар»га киритилган, етакчи ишлаб чиқарувчилар Ўзбекистон пахтасини бойкот қилган эди.
2019 йилнинг 4 февралида бош вазир ўринбосари Танзила Норбоева бошчилигидаги делегациянинг Вашингтонга ишчи ташрифида Cotton Campaign тўқимачилик маҳсулотларига қарши «бойкот»ни бекор қилиш бўйича режасини тақдим этган эди.
Изоҳ (0)