Хитойликлар коронавирус ўчоғи ҳисобланган Ухань чегарасини 30 январга қадар кесиб ўтолмайди

Хитой фуқаролари 30 январга қадар янги турдаги коронавируснинг асосий ўчоғига айланган Ухань шаҳрининг чегарасини кириш мақсадида ҳам, чиқиш мақсадида ҳам кесиб ўта олмайди. Бу ҳақда шаҳар миграция бошқармаси баёнот берди, дея хабар бермоқда «РИА Новости».

«Янги турдаги коронавирус тарқалишига қарши кураш ва унинг профилактикасини кучайтириш мақсадида шаҳарнинг барча ўтказиш пунктларида Хитойнинг барча фуқаролари учун чегарани кесиб ўтишни 30 январга қадар вақтинча тўхтатиш ҳақида қарор қабул қилинди», — дейилади бошқарма хабарида. Худди шундай чоралар Гонконг, Макао ва Тайванга борди-келдилар учун ҳам жорий этилган.

11 миллион аҳоли истиқомат қиладиган Ухань шаҳри коронавирус эпидемияси сабабли, амалда ўтган пайшанба (23 январь)дан бери ташқи дунёдан узилган, шаҳарда транспорт, хусусан, метро, автобус, паром қатновлари тўхтатилган, шаҳарга автобус ва сув транспорти киритилмаяпти, аэропортдан ва темирйўл станцияларидан кетишлар ҳам бекор қилинган, шаҳар маъмурияти бу ерга келмасликни ва алоҳида сабабсиз кўчага чиқмасликни тавсия қилмоқда.

Хитой ҳукумати 2019 йилнинг 31 декабрь куни мамлакатнинг қисмида жойлашган Ухань шаҳрида келиб чиқиши номаълум пневмония эпидемияси бошлангани ҳақида Жаҳон соғлиқни сақлаш ташкилотига ахборот берган эди. Мутахассислар касаллик қўзғатувчиси нима эканини аниқлаган — бу 2019-nCoV коронавируси. Хитойдан ташқари Гонконг, Макао, Тайван, Таиланд, Япония, Жанубий Корея, АҚШ, Канада, Вьетнам, Сингапур, Непал, Франция, Австралия ва Малайзияда коронавирус билан хасталанган беморлар аниқланган.

Янги коронавирусни юқтириш оқибатида Хитойда вафот этганлар сони 27 январь куни тонгда 80 кишига етган. Хитой Соғлиқни сақлаш масалалари давлат қўмитаси маълумотларига кўра, жами 2744 киши касалланган.

Маълумот учун, Ухань шаҳрида 30 нафардан 60 нафаргача ўзбекистонлик бўлиши мумкин, уларнинг аксарияти талабалардир. Аввалроқ Ўзбекистон Ташқи ишлар вазирлиги карантин эълон қилинган Ухань шаҳридан чет эл фуқароларини эвакуация қилиш бўйича мурожаатларга Хитой расмийлари рад жавобини бераётганини билдирган эди.

«Карантин киритилганидан сўнг бошқа давлатнинг элчихоналари ўз фуқароларини Ухандан эвакуация қилгани тўғрисидаги хабар ҳақиқатга тўғри келмайди», — дейилганди ТИВ ахборотида. Ўз навбатида, Ўзбекистон ёшлар умумжаҳон ассоциацияси Хитойдаги ўзбекистонлик талабалардан коронавирус билан боғлиқ вазият юзасидан нотўғри маълумот тарқатиб, вазиятни кескинлаштирмасликни сўраган эди.

Бунгача эса Ўзбекистон ташқи ишлар вазири Абдулазиз Комилов Ухандаги ўзбекистонлик талабалар «албатта олиб келиниши», бу борада Хитой расмийлари билан иш олиб борилаётганини маълум қилган эди. 26 январь куни эса Хитойда таҳсил олаётган ўзбекистонликларнинг биринчи гуруҳи қайтарилгани маълум бўлди — улар Тошкент аэропортининг ўзида жиддий текширувдан ўтказилган.