Бойсун туманидаги «Хўжаидод» маҳалласида яшовчи шошилинч тиббий ёрдамга муҳтож 7-синф ўқувчиси Н.А. қалин қор сабаб шифохонага бора олмаётган эди. Фавқулодда вазиятлар бошқармаси ходимлари кўмагида бемор ўқувчи шифохонага етказилди. Бу ҳақда «Дарё»га журналист Наргиза Раҳматуллаева хабар берди.
Маълум бўлишича 24 январга ўтар кечаси вилоят Фавқулодда вазиятлар бошқармасига Бойсун туманининг «Хўжаидод» маҳалласида яшовчи I.Н.дан мурожаат келиб тушган. Мурожаатда фуқаро яқинининг тўсатдан тоби қочиб қолганлигини, туман марказигача бўлган 35 километр йўлни қалин қор қоплаганлиги сабабли шифохонага бориш муаммо бўлаётганлигини айтган.
Ушбу мурожаат бўйича Бойсун туман ФВБ бошлиғи Баҳриддин Мирзаев, бўлинма бошлиғи Ваҳоб Қаҳҳоров раҳбарлигидаги қутқарувчилар тиббий ёрдамга муҳтож Н.А.ни Бойсун туман марказий шифохонасига етказган. Шунингдек, туман марказигача бўлган ички автомобиль йўлни ҳам қордан тозалаш ишлари амалга оширилган.
— Бемор Н.А.га шифокорлар томонидан «ўткир аппендицит» ташхиси қўйилиб, жарроҳлик йўли билан оператив муолажа амалга оширилди ва бемор ҳаёти сақлаб қолинди. Ҳозирда беморнинг соғлиғи яхши, — дейди вилоят ФВБ матбуот котиби Жалолиддин Жўраев.
Қайд этилишича, ушбу тадбирда вилоят ФВБ тизими ва тумандаги тегишли ташкилотлардан 10 дан ортиқ махсус техникалар ва 43 нафар ходим жалб этилган.
Изоҳ (0)