Boysun tumanidagi “Xo‘jaidod” mahallasida yashovchi shoshilinch tibbiy yordamga muhtoj 7-sinf o‘quvchisi N.A. qalin qor sabab shifoxonaga bora olmayotgan edi. Favqulodda vaziyatlar boshqarmasi xodimlari ko‘magida bemor o‘quvchi shifoxonaga yetkazildi. Bu haqda “Daryo”ga jurnalist Nargiza Rahmatullayeva xabar berdi.
Ma’lum bo‘lishicha 24-yanvarga o‘tar kechasi viloyat Favqulodda vaziyatlar boshqarmasiga Boysun tumanining “Xo‘jaidod” mahallasida yashovchi I.N.dan murojaat kelib tushgan. Murojaatda fuqaro yaqinining to‘satdan tobi qochib qolganligini, tuman markazigacha bo‘lgan 35 kilometr yo‘lni qalin qor qoplaganligi sababli shifoxonaga borish muammo bo‘layotganligini aytgan.
Ushbu murojaat bo‘yicha Boysun tuman FVB boshlig‘i Bahriddin Mirzayev, bo‘linma boshlig‘i Vahob Qahhorov rahbarligidagi qutqaruvchilar tibbiy yordamga muhtoj N.A.ni Boysun tuman markaziy shifoxonasiga yetkazgan. Shuningdek, tuman markazigacha bo‘lgan ichki avtomobil yo‘lni ham qordan tozalash ishlari amalga oshirilgan.
— Bemor N.A.ga shifokorlar tomonidan “o‘tkir appenditsit” tashxisi qo‘yilib, jarrohlik yo‘li bilan operativ muolaja amalga oshirildi va bemor hayoti saqlab qolindi. Hozirda bemorning sog‘lig‘i yaxshi, — deydi viloyat FVB matbuot kotibi Jaloliddin Jo‘rayev.
Qayd etilishicha, ushbu tadbirda viloyat FVB tizimi va tumandagi tegishli tashkilotlardan 10 dan ortiq maxsus texnikalar va 43 nafar xodim jalb etilgan.
Izoh (0)