Тахиатош иссиқлик электр станциясида умумий қуввати 560 мегаватт бўлган иккита янги буғ-газ қурилмаси ишга туширилади. Бу ҳақда Ўзбекистон Энергетика вазирлиги хабар берди.
Маълум қилинишича, Қорақалпоғистон Республикаси ва Хоразм вилояти аҳолисини электр энергиясига бўлган эҳтиёжини қоплаш мақсадида йирик лойиҳа амалга оширилмоқда.
Таъкидланишича, 2020 йилнинг 21 январь куни биринчи буғ-газ қурилмасининг газ турбинаси муваффақиятли ишга туширилди ва электр тармоққа қувват бера бошлади. Ҳозирги вақтда буғ-газ қурилмасида бош пудратчи режасига асосан синов-созлаш ишлари амалга оширилмоқда. Лойиҳанинг умумий қуввати 560 мегаватт бўлиб, июль ойида тўлиқ ишга туширилиши режалаштирилган.
Ушбу лойиҳани амалга ошириш ҳисобига йилига 488,6 миллион куб метр ёқилғи тежалишига эришилади ва ўсиб бораётган электр энергияси истеъмолини қоплаш имконини беради.
Мазкур ИЭСнинг самарадорлиги ўртача ҳисобда 31,2 фоиздан 49,7 фоизга ошади, ишлаб чиқариладиган электр энергиясининг йиллик ҳажми 3,6 миллиард киловатт соатни ташкил қилади. Ишлаб чиқариладиган иссиқлик энергиясининг йиллик ҳажми 139 минг гигакалорияни ташкил этади. Станцияда 97 та янги иш ўрни яратилади.
Изоҳ (0)