Taxiatosh issiqlik elektr stansiyasida umumiy quvvati 560 megavatt bo‘lgan ikkita yangi bug‘-gaz qurilmasi ishga tushiriladi. Bu haqda O‘zbekiston Energetika vazirligi xabar berdi.
Ma’lum qilinishicha, Qoraqalpog‘iston Respublikasi va Xorazm viloyati aholisini elektr energiyasiga bo‘lgan ehtiyojini qoplash maqsadida yirik loyiha amalga oshirilmoqda.
Ta’kidlanishicha, 2020-yilning 21-yanvar kuni birinchi bug‘-gaz qurilmasining gaz turbinasi muvaffaqiyatli ishga tushirildi va elektr tarmoqqa quvvat bera boshladi. Hozirgi vaqtda bug‘-gaz qurilmasida bosh pudratchi rejasiga asosan sinov-sozlash ishlari amalga oshirilmoqda. Loyihaning umumiy quvvati 560 megavatt bo‘lib, iyul oyida to‘liq ishga tushirilishi rejalashtirilgan.
Ushbu loyihani amalga oshirish hisobiga yiliga 488,6 million kub metr yoqilg‘i tejalishiga erishiladi va o‘sib borayotgan elektr energiyasi iste’molini qoplash imkonini beradi.
Mazkur IESning samaradorligi o‘rtacha hisobda 31,2 foizdan 49,7 foizga oshadi, ishlab chiqariladigan elektr energiyasining yillik hajmi 3,6 milliard kilovatt soatni tashkil qiladi. Ishlab chiqariladigan issiqlik energiyasining yillik hajmi 139 ming gigakaloriyani tashkil etadi. Stansiyada 97 ta yangi ish o‘rni yaratiladi.
Izoh (0)