Ёшлар Иттифоқи марказий кенгашида «Оила» илмий-амалий тадқиқот маркази томонидан интернет тармоғининг оила мустаҳкамлигига, болалар онгига таъсирини ўрганиш масалаларига бағишланган тадбир бўлиб ўтди. Бу ҳақда «Kun.uz» хабар бермоқда.
Тадбирда марказ раҳбари Дилором Тошмуҳаммедова оилаларда интернет тармоғининг ўрнини аниқлаш юзасидан ўтказилган тадқиқот натижаларини маълум қилди.
«Ўзбекистондаги болаларнинг 10 фоизи виртуал олам таъсирига ҳаддан ортиқ берилиб кетган. Бу рақам катта бўлмаса-да, кейинчалик ошиб кетиш эҳтимоли анча юқори. Биз ёш оилалар йўналишида тадқиқот ўтказдик. Унда эндигина оила қурган ёшларни қамраб олдик. Сўровлар натижаси шуни кўрсатдики, фақат 15 фоиз эркаклар ўз фарзанди тарбиясига вақт ажратишар экан. Яна бошқа тадқиқотга кўра, бир кунда ёш ота-оналар фарзанди билан 13-17 дақиқа оралиғида суҳбат қилишга вақт ажратиши маълум бўлди.
Бу рақамлар қатъий чоралар кўришни талаб қиляпти. Катталар томонидан телефонга тарбия воситаси сифатида қаралмоқда. Натижада 5-6 яшар болалар нафақат телефон қурилмаларидан бемалол фойдаланяпти, балки ижтимоий тармоққа кириб онлайн суҳбатлар ўтказяпти. Бу ҳолатга ўзим гувоҳ бўлдим. Масалани ҳал қилишда медиатаълимни дарслик сифатида мактаб, мактабгача таълим муассасаларига кирита олсак, айни муддао бўларди», — деди Тошмуҳаммедова.
Қўшимча қилинишича, мазкур соҳада қабул қилинган ҳуқуқий ҳужжатлар яхлит қонун сифатида бирлаштирилмаган, фақат қонуности ҳужжатлари амалда. Натижада, ҳар бир масъул ташкилот бирлашмасдан, алоҳида бу масала бўйича чора-тадбирларни амалга оширади, лекин таъсири жуда сустлигича қолмоқда.
Тадбирда марказ илмий гуруҳ аъзоси Фурқат Олимов Ўзбекистонда интернет тармоғи фойдаланувчилари тоифаси бўйича маълумот берди.
«Мутахассисларимиз томонидан олиб борилган социологик тадқиқотларга кўра, Ўзбекистонда 23 миллион фуқаро интернет фойдаланувчиси ҳисобланади. Уларни тоифаларга бўладиган бўлсак, ўрта, фаол ва ўта фаол фойдаланувчиларга бўлинади. Одатий фойдаланувчилар кунига 2 соатдан кўп бўлмаган вақтни виртуал оламда ўтказади. 3-4 соат давомида интернет тармоғидан фойдаланувчилар эса ўрта тоифага киритилди. Ўз навбатида, 5 соат ва ундан ортиқ вақтини интернетда ўтказадиганлар ўта фаол категорияга киради.
Тадқиқот натижалари шуни кўрсатмоқдаки, айни вақтда ижтимоий тармоқ мессенжерлари орасида видео шаклидагилари кўпроқ зарар келтирмоқда. Улар орасида YouTube порно тасвирларни тарқатишда асосий ўринни эгаллаб турибди. Юқоридаги социологик тадқиқотлар болалар билан ишловчи 1790 нафар ўқитувчи ўртасида ўтказилди», — дейди у.
Изоҳ (0)