ТИВ коронавирус тарқалган Хитойнинг Ухань шаҳрида қанча ўзбекистонлик борлиги ҳақида маълумот берди

Ўзбекистоннинг Хитойдаги елчихонаси Хубэй провинциясининг Ухань шаҳрида коронавирус тарқалишига оид вазиятни доимий равишда кузатиб бормоқда. Расмийларга кўра, шаҳарда махсус шошилинч штаб жойлаштирилган ва 2020 йил 23 январь соат 10:00 дан бошлаб жамоат транспорти (автобуслар, метро, паромлар ва бошқалар) вақтинча тўхтатилди, аэропорт ва темир йўл станцияларидан чиқадиган рейслар бекор қилинди. Шаҳардан чиқиш йўллари ёпилган. Шаҳарнинг барча транспорт воситалари ҳуқуқни муҳофаза қилиш органлари томонидан назоратга олинган, деб ёзмоқда Ўзбекистон ташқи ишлар вазирлиги.

Маълумотларга кўра, Ухань шаҳрида 250 нафар атрофида Ўзбекистон фуқаролари, асосан олий таълим муассасалари талабалари яшайди. Уларнинг кўпчилик қисми семестр якунланганлиги сабабли Ўзбекистонга қайтган. Элчихона маълумоти бўйича ҳозирда шаҳарда 30 дан ортиқ Ўзбекистон фуқаролари бўлиши мумкин. Уларга консуллик-ҳуқуқий ёрдам кўрсатиш учун Wechat ижтимоий тармоғида «Ухань 2020 Ўзбекистон» гуруҳи тузилган. Талабаларга хотиржамликни сақлаш, зарурий эҳтиёт ва профилактика чораларига амал қилиш кераклиги тушунтирилган, элчихона консуллик бўлими ходимларининг телефон рақамлари берилган. Мазкур йўналишда ишлар давом эттирилмоқда.

ТИВ Консуллик-ҳуқуқий департаменти Хитой ҳудудидаги Ўзбекистон фуқароларига зарурат туғилганда мамлакатимизнинг Пекин шаҳридаги элчихонасига (тел.: +8610-6532-6305) ҳамда Шанхай шаҳридаги Бош консулхонасига (тел.: +8621-6307-1896) мурожаат қилишлари мумкинлигини эслатиб ўтади, дейилади хабарда.

2020 йил 23 январь ҳолатига бутун дунёда коронавирус билан зараланиш бўйича 617 та ҳолат кузатилган, шуларнинг 17 тасида беморлар вафот этган. Ҳасталик асосий маркази Хитойнинг Ухань шаҳри, у ерда жами 444 та одамга пневмонияга учраш ҳолати кузатилган. Касаллик тарқалишининг олдини олиш мақсадида Ухань шаҳрига кириш ва ундан чиқишни деярли ёпиб қўйган. Хуангане ва Эчжоу шаҳарларида ҳам шунда чора-тадбирлар амалга оширилган.

Тожикистоннинг Somon Air авиаширкати февраль ойигача Душанбе – Урумчи (Хитой) йўналишидаги парвозларни тўхтатган.