Фарғона вилоятида жойлашган Чўнғара қишлоғига ташриф буюрган вилоят ҳокими Шуҳрат Ғаниевни кутиб олиш учун совуқ кунда юпун кийинган қизча қўлида нон кўтариб тургани акс этган сурат ижтимоий тармоқларда муҳокамаларга сабаб бўлмоқда. Фарғона вилояти ҳокимлиги мазкур муҳокамаларга муносабат билдирди ва суратга тушунтириш берди.
Маълум қилинишича, Шуҳрат Ғаниев қишлоққа ташриф буюргач, дастлаб чўнғаралик ёшлар билан учрашув бўлиб ўтган.
«Ҳоким учрашув бўлиши режалаштирилган бинога кираверишдаги айвончага етганида тўсатдан зал ичидан суратдаги қиз нон кўтариб чиқиб келди. Ҳоким унинг райини қайтармай, нондан тотинди ва қизни етаклаб залга кирди. Шу заҳоти чўнғаралик ташкилотчиларга бошқа бундай қилмасликни тайинлади. Қизча залдан атиги бир, нари борса икки дақиқага айвончага чиқди холос», — дейилади ҳокимлик хабарида.
Вилоят ҳокимлигининг маълумот беришича, Чўнғара анклав ҳолатдаги қишлоқ бўлиб, унда 240 та хонадон, 1401 нафар аҳоли яшайди. Вилоят ҳокими Шуҳрат Ғаниев вилоятдаги барча масъул шахслар билан 18 январь куни қишлоққа ташриф буюрган. Вилоят ҳокимининг ташрифи чоғида 320 миллион сўмлик дори воситалари олиб борилиб, барча аёллар, болалар, беморлар тиббий кўрикдан ўтказилган.
Шунингдек, шу куни фидойи ва фахрий инсонларга «Косонсой», «Товоқсой» ва «Қизилтепа» сиҳатгоҳларига бепул йўлланмалар берилган. Қишлоқдаги 259 нафар ўқувчиси бўлган мактабга 50 та компьютер, спорт анжомлари (теннис столи, тўплар, бокс жиҳозлари) иккита телевизор, икки мингта китоб, 30 та мусиқа асбоби совға қилинган. Шу билан бирга, фахрий оқсоқолларга 50 та велосипед тарқатилган.
Ҳокимнинг ташрифи вақтида четдан қатнаб ишлайдиган ўқитувчилар учун икки қаватли уч хонали 15 та хонадонли уй қуриб бериш ҳақида қарор қабул қилинди ва ер ажратилди. Бундан ташқари, 50 ўринли илк болалар боғчаси очилди ва яна 80 ўринли болалар боғчаси қурилишига маблағ ажратилиб, ер танланди. 240 та хонадонга бепул газ балонлари тарқатилди.
Изоҳ (0)