Бухоро вилоятидаги Қоровулбозор—Бухоро йўлида 20 январь, душанба куни соат тахминан 08:30 да мудҳиш автоҳалокат содир бўлди. Бухоро вилояти ИИБ матбуот хизматининг «Дарё»га маълум қилишича, содир бўлган мудҳиш авария оқибатида бир аёл ва бир эркак ҳалок бўлган, бир киши ўта оғир аҳволда.
Маълумотга кўра, ЙТҲ фуқаро А.А. ўзининг бошқарувида бўлган Nexia-3 русумли автомашинасини «А-380» автомобиль йўли бўйлаб, Когон—Қоровулбозор йўналишида бошқариб кетаётган вақтда юз берган. Ҳайдовчи ушбу йўлнинг 199-километрига етганида йўлнинг ўрта бўлагида ўзидан олдинда ҳаракатланиб бораётган фуқаро А.Э. бошқарувидаги «НОКА» русумли юк автомашинасининг орқа қисмига урилган. Натижада Nexia ағдарилиб, йўл транспорт ҳодисаси содир бўлган.
ЙТҲ натижасида Nexia-3 ҳайдовчиси А.А. ва ушбу автомашина йўловчиси фуқаро М.Р. ҳодиса содир бўлган жойда оғир тан жароҳатлари билан вафот этган. Орқа ўриндиқда бўлган А.Э. эса оғир тан жароҳатлари билан Когон шаҳар тиббиёт бирлашмасига ётқизилган.
Вилоят Соғлиқни сақлаш бошқармаси бошлиғи Ихтиёр Нарзуллаевнинг маълум қилишича, бемор аввалига Когон шаҳар марказий касалхонасига олиб келинган. Биринчи ёрдам кўрсатилгач, Республика шошилинч тиббий ёрдам маркази Бухоро филиалининг нейрореанимация бўлимига ўтказилган. Айни пайтда бемор шифокорлар назоратида.
Мазкур ҳолат юзасидан вилоят прокуратураси ўта оғир жиноятларни тергов қилиш бўлими томонидан Ўзбекистон Республикаси Жиноят кодексининг 266-моддаси 3-қисми «а» банди билан жиноят иши қўзғатилиб, ўта оғир жиноятларни тергов қилиш бўлими томонидан дастлабки тергов ҳаракатлари бошланган.
Изоҳ (0)