«Ипак йўли» университети ҳамда Экстремал ва тоғ туризми федерацияси ҳамкорлик меморандумини имзолади

Самарқанддаги «Ипак йўли» халқаро туризм университети ҳамда Ўзбекистон Экстремал ва тоғ туризми федерацияси ўртасида академик ва таълим йўналишида ҳамкорлик қилишга доир англашув меморандуми имзоланди. Бу ҳақда Туризмни ривожлантириш давлат қўмитаси хабар берди.

Маълум қилинишича, ушбу ҳужжатнинг имзоланиши турли соҳаларда истиқболли ҳамкорлик йўлида қўйилган қўшма қадамини англатади ҳамда талабаларнинг янги билимларга эга бўлиши ва тажриба алмашишда уларнинг мобиллигини оширишга имкон беради.

Қайд этилшича, Ўзбекистон Экстремал ва тоғ туризми федерацияси ҳар йили Халқаро атроф-муҳитни ҳимоя қилиш кунига бағишланган «Чимён акс-садоси» экологик туристик фестивали, «Тошкент қуёши» мотофестивали, «Спорт туризми ва спорт йўналтириш бўйича Ўзбекистон кубоги», «Йўлтанламас автоларда мусобақалар автотуризми» ва бошқа тадбирларни ўтказади.

Аввалроқ «Ипак йўли» университетининг биринчи проректори Азамат Акбаров хорижда олган фалсафа доктори (PhD) илмий даража дипломи қалбаки бўлиб чиққани сабабли ишдан олинган эди.