Шавкат Мирзиёев Томскдаги ёнғин юзасидан Ҳукумат комиссиясини тузишга кўрсатма берди

Ўзбекистон Президенти Шавкат Мирзиёевнинг кўрсатмасига асосан Россиянинг Томск вилоятида юз берган ёнғинда ҳалок бўлган ва жабрланган фуқароларнинг оила аъзоларига ёрдам кўрсатиш мақсадида Ҳукумат комиссияси тузилди. Бу ҳақда Фавқулодда вазиятлар вазирлиги матбуот хизмати хабар берди.

Ҳукумат комиссиясига қуйидаги вазифалар юклатилди:

• ҳалок бўлган фуқаролар ва жабрланганларнинг яқинларига зарур тиббий ва психологик ёрдам кўрсатиш;
• жабрланган ва ҳалок бўлган Ўзбекистон фуқароларининг жасадини Ватанга олиб келиш бўйича ташкилий чораларни кўриш;
• Россия мутахассислари билан ҳамкорликда ёнғинни келиб чиқиш сабабларини ўрганиш;
• маҳаллий ҳокимият ва ўзини ўзи бошқариш органлари билан биргаликда вафот этган фуқароларнинг шахсига аниқлик киритиш ва уларнинг оила аъзоларига дафн маросимларини ўтказишда амалий ёрдам кўрсатиш.

Эслатиб ўтамиз, 21 январга ўтар кечаси Россиянинг Томск вилоятида ёғоч компаниясида ишловчи ўзбекистонликлар истиқомат қиладиган ёғочли уйда ёнғин чиқди. Ёнғин оқибатида 10 нафар ўзбекистонлик вафот этиб, 2 нафари жабрланди. Шунингдек, бир нафар рус аёли ҳам ҳалок бўлди.ФВВ ҳодиса оқибатида вафот этган 9 нафар ўзбекистонликнинг шахси аниқланганини маълум қилди. Уларнинг 8 нафари Навоий вилоятининг Қизилтепа туманида, бир нафари Самарқанд вилоятининг Каттақўрғон туманидан. Яна бир қурбоннинг шахсига аниқлик киритиш ишлари олиб борилмоқда.Россия Тергов қўмитасига кўра, қурбонларнинг жасадлари қорайиб, куйиб кетган ҳамда таниб бўлмас даражага келган.

«Уларнинг шахси генотипик экспертиза ёрдамида аниқланади. Яъни ҳалок бўлганларнинг қариндошларидан қон намунаси олинади ва тана қолдиқлари намуналари билан солиштирилади», — дейилади Тергов қўмитаси хабарида