Олий Мажлис Қонунчилик палатасининг сайловдан кейинги биринчи мажлисида Шавкат Мирзиёев ўз қаршисида сўзга чиққан Олий Мажлис Қонунчилик палатаси депутати Виктор Пакнинг Президентга унвон бериш таклифини рад этди. Бу ҳақда «Дарё» мухбири Миролим Исажонов хабар берди.
Мажлисда муҳокама қилинган масалалар юзасидан нутқ сўзлаган қатор депутатлар сингари ўз фикрини билдирган депутат Виктор Пак сўнгги уч йилда бутун мамлакатда улкан ўзгаришлар амалга оширилгани, олис қишлоқларгача янги ҳаёт кириб бораётганини таъкидлади.
У ўзининг 140 мингдан зиёд сайловчилари хоҳиш-иродасини ифода этиб, Президентга давлат мукофоти бериш таклифини илгари сурди. Унинг бу таклифини барча депутатлар қарсаклар билан қўллаб-қувватлади, аммо Шавкат Мирзиёевнинг ўзи бу таклифни рад этди.
Сиз битта нозик масала — унвон тўғрисида гапирдингиз. Бу биринчи марта бўлаётгани йўқ. Халқимиз менга катта унвон бериб бўлган. Бундан катта унвон дунёда ҳеч кимда бўлмаса керак. Бу — халқ ишончи.Ушбу унвонга лойиқ бўлиш ҳар кимга ҳам насиб этмайди. Биргаликда шу унвонга лойиқ бўлиб, ҳаракат қилиб, одамларимизни рози қилсак, бундан катта унвон йўқ.
Сиз ҳам сайловчиларингизга миннатдорчилигимни билдиринг. Мен ҳам уларга раҳмат айтмоқчиман.
Шавкат Мирзиёев, Ўзбекистон Президенти
Изоҳ (0)