Қашқадарёда 105 миллион сўм алимент пулини тўламаган қарздор отага жиноят иши қўзғатилди. Бу ҳақда «Дарё»га МИБ вилоят бошқармаси ахборот хизмати хабар берди.
Маълум қилинишича, Нишон тумани «Нишон» маҳалласида яшовчи фуқаро Х.Д.га туман Маъмурий суди томонидан вояга етмаган фарзандларини моддий таъминлашдан бўйин товлаганлиги учун 15 сутка маъмурий қамоқ жазоси тайинланган. Аммо фуқаро бундан хулоса чиқармаган ва алимент тўлашдан бўйин товлаш жиноятини содир этган.
Аниқлик киритилишича, Х.Д.нинг алиментдан қарздорлиги 2019 йил 27 декабрь кунги ҳисоб-китобга кўра, 105 миллион 68 минг сўмни ташкил этган.
Мазкур ҳолат юзасидан Бюронинг Нишон тумани бўлими томонидан фуқаро Х.Д.га нисбатан Жиноят Кодексининг 122-моддаси 1-қисми билан жиноят иши қўзғатилиб, суриштирув ҳаракатлари олиб борилмоқда.
Шунингдек, туманнинг Талимаржон шаҳарчасида яшовчи фуқаро М.М. ҳам 2 нафар фарзандининг моддий таъминоти учун 2019 йилнинг 21 май кунидан 2019 йил 27 декабрь кунига қадар жами 63 миллион 257 минг сўм миқдоридаги алимент пулларини тўлашдан қасддан бўйин товлаб келганлиги учун унга ҳам жиноят иши қўзғатилди.
Изоҳ (0)