Касби туман ҳокимлигининг ахборот хизмати раҳбари туман ҳокимлигида иш юритса-да, ойлик маошни туман халқ таълими бўлимидан олади. Бу ҳақда туман ҳокимлигида бўлиб ўтган матбуот анжуманида маълум қилинди, дея хабар беради «Дарё» мухбири Отабек Қўлдошев.
Маълум бўлишича, 20 январь, душанба куни Касби тумани ҳокими Тўхтамурод Мейлиев иштирокида матбуот анжумани ташкил этилган. Унда «Дарё» мухбирининг саволига жавобан ҳоким Тўхтамурод Мейлиев матбуот котиби 2019 йил август ойидан 2020 йил январь ойи бошига қадар туман кўникма маркази ходими сифатида, жорий йилдан эса халқ таълими ходими сифатида ҳужжатларда қайд этилаётганини айтган.
— Матбуот котибим ҳужжатларда аввал туман кўникма маркази ходими сифатида, ҳозирда эса туман халқ таълими бўлими ходими сифатида ишга олинган, — дейди туман ҳокими. — Туман бюджетини тасдиқлаш арафасидамиз, насиб этса февраль ойидан ходимимизнинг ойлик маоши ҳам белгиланган тартибда ўринбосарларга тўлангани каби тўланади. Хизмат автомобили ҳам берилади.
Маълум бўлишича, туман ҳокимлигининг ахборот хизмати раҳбари айни кунда туман халқ таълими бўлимининг етакчи мутахассиси сифатида ойлик маош олади.
Президентнинг 2019 йил 27 июндаги «Оммавий ахборот воситалари мустақиллигини таъминлаш ҳамда давлат органлари ва ташкилотлари ахборот хизматлари фаолиятини ривожлантириш бўйича қўшимча чора-тадбирлар тўғрисида»ги қарорида давлат органлари ва ташкилотлари ахборот хизматлари раҳбарлари бир вақтнинг ўзида давлат органи ва ташкилоти раҳбарининг матбуот котиби ҳисобланиб, ахборот сиёсати масалалари бўйича раҳбарнинг маслаҳатчиси мақомига эга бўлиши белгиланганди. Шунингдек, мазкур лавозим эгалари меҳнатга ҳақ тўлаш, тиббий ва транспорт хизмати кўрсатиш шартларига кўра давлат органи ва ташкилоти раҳбарининг ўринбосарига тенглаштирилганди.
Эслатиб ўтамиз, вилоят раҳбари Зоир Мирзаев туман ҳокимлиги ахборот хизмати раҳбарлари иш фаолиятини танқид қилганди.
Изоҳ (0)