АҚШ Конгрессининг тадқиқот хизмати Ўзбекистондаги ислоҳотларга баҳо берилган ҳисоботни эълон қилди. Бу ҳақда Ташқи ишлар вазирлиги ўзининг Facebook’даги саҳифаси орқали хабар берди.
Ҳужжатда таъкидланишича, Дональд Трамп администрацияси бошиданоқ Ўзбекистоннинг ислоҳотларни амалга ошириш бўйича саъй-ҳаракатларини қатъий қўллаб-қувватлаб келмоқда. Президент Шавкат Мирзиёевнинг 2018 йил май ойида Вашингтон шаҳрига расмий ташрифи чоғида қабул қилинган «Ўзбекистон ва АҚШ: стратегик шерикликнинг янги даври бошланиши» қўшма баёнотининг аҳамияти таъкидланди.
Ҳисобот муаллифлари хабар беришича, АҚШнинг Ўзбекистонга кўрсатаётган ёрдами мамлакатдаги ислоҳотларни қўллаб-қувватлашга, қонун устуворлиги ва иқтисодий ривожланишга, шу жумладан, Америка технологияларидан фойдаланган ҳолда қишлоқ хўжалигини диверсификация қилишга кўмак беришга қаратилгандир. Ёрдам, шунингдек, хавфсизлик ва минтақавий барқарорликни таъминлаш мақсадида чегара назоратини яхшилашни ҳам кўзда тутади.
Шу нуқтаи назардан қайд этилишича, Давлат департаменти Ўзбекистон учун 2020-молиявий йил учун 14,4 миллион доллар сўради. 2017-молиявий йилда бу рақам 10,6 миллион доллар бўлган.
2017—2018 йилларда мамлакатлар ўртасидаги савдо айланмаси ҳажми икки баравар кўпайди (тахминан 150 миллиондан 300 миллион долларгача). АҚШ савдо вазири Уилбур Росснинг фикрича, «савдо-иқтисодий алоқаларни мустаҳкамлаш учун катта имкониятлар мавжуд».
«Иқтисодиётни либераллаштиришга келсак, Ўзбекистонда давлатнинг ролини хусусий сектор фойдасига камайтириш ва йирик хорижий инвестицияларни жалб қилишга қаратилган ислоҳотлар амалга оширилди. Ҳукумат мамлакатда ишбилармонлик муҳитини яхшилаш ва давлат бошқарувини оптималлаштиришга устувор аҳамият бермоқда», — дейилади хабарда.
Изоҳ (0)