Олий Мажлис Қонунчилик палатасида илк бор спикернинг биринчи ўринбосари бўлади. Бу лавозимни Акмал Саидов эгаллаши кутилмоқда

Тошкентда 20 январь куни Олий Мажлис Қонунчилик палатаси янги таркибининг биринчи мажлиси бўлиб ўтмоқда. Мажлисни Марказий сайлов комиссияси раиси Мирзо-Улуғбек Абдусалом очиб берди.

Тадбирда дастлаб Олий Мажлис Қонунчилик палатасига сайланган депутатлар бирма-бир таништирилди, шундан сўнг унинг кун тартиби тасдиқланди, дея хабар бермоқда «Дарё» мухбири Миролим Исажонов.

Мажлис кун тартибидан қуйидаги масалалар ўрин олган:

• Олий Мажлис Қонунчилик палатаси депутатлари сайловлари якунлари тўғрисида Марказий сайлов комиссияси ахбороти тўғрисида;
• Олий Мажлис Қонунчилик палатаси спикери, унинг ўринбосарлари лавозимларига номзодлар кўрсатиш бўйича сиёсий партиялар вакиллари кенгашини сайлаш тўғрисида;
• Олий Мажлис Қонунчилик палатаси спикери, унинг биринчи ўринбосари ва ўринбосарларини сайлаш тўғрисида;
• Сиёсий партияларнинг фракцияларини рўйхатга олиш тўғрисида;
• Олий Мажлис Қонунчилик палатаси қўмиталари рўйхатини тасдиқлаш ва сиёсий партиялар фракциялари ўртасида қўмиталар раислари лавозимларини тақсимлаш тўғрисида;
• Олий Мажлис Қонунчилик палатаси қўмиталари раисларини сайлаш тўғрисида.

Қайд этиш жоиз, Олий Мажлис Қонунчилик палатасида шу вақтгача спикернинг биринчи ўринбосари лавозими бўлмаган. Тасдиқланмаган маълумотларга кўра, ушбу лавозимга шу вақтгача парламент қуйи палатасида қўмитаси раиси вазифасида фаолият юритиб келган Акмал Саидов сайланиши мумкин.