Ўзбекистон Марказий банки томонидан банкларнинг веб-сайтлари юритилиши юзасидан ўрганиш ўтказилди. Натижада, айрим банклар ахборотларни ошкор қилишга доир талабларга лозим даражада амал қилмаганлиги аниқланди. Бу ҳақда Марказий банк томонидан маълум қилинди.
Марказий банкнинг қайд этишича, айрим банкларнинг веб-сайтларида қуйидаги камчиликлар мавжуд:
- долзарб маълумотлар жойлаштирилмаган;
- хизматлар ҳақидаги маълумотлар янгиланмаган ёки тақдим этилаётган хизматларнинг шартлари тўлиқ келтирилмаган;
- потенциал қарз олувчилар учун кредитнинг тўлиқ қийматини мустақил равишда ҳисоблаш имконияти яратилмаган;
- қарз олувчилар учун шахсий кабинет очиш имконияти мавжуд эмас;
- мурожаатларни юбориш учун имкониятлар яратилмаган.
Шу муносабат билан корпоратив веб-сайтлар орқали маълумотларни ошкор қилишда қоидабузарликларга йўл қўйган банкларга уларни бартараф этиш бўйича кўрсатмалар берилди.
Марказий банк томонидан таъкидланишича, «Банклар ва банк фаолияти тўғрисида»ги қонунга мувофиқ, банк хизматларидан фойдаланувчилар банк ва банк хизматларини танлашда эркиндир. Банклар эса шартнома тузишдан олдин истеъмолчиларга банк хизматларидан фойдаланиш шартлари билан танишиш имкониятини таъминлаши шарт.
Шу билан бирга, банк хизматларини тақдим этишнинг умумий шартлари, комиссия тўловлари, тарифлар ва банк хизматлари учун фоиз ставкалари тўғрисидаги маълумотлар очиқ маълумотлар бўлиб, банкнинг расмий веб-сайтида эълон қилинади.
Изоҳ (0)