«Юксалиш» умуммиллий ҳаракати Ўзбекистондаги аҳоли яшаш пунктларида транспорт ҳаракатининг рухсат этилган энг юқори тезлигини 70 км/соатдан 60 км/соатга пасайтиришни таклиф қилмоқда. Бу ҳақда ҳаракатнинг матбуот хизмати томонидан хабар берилди.
Ички ишлар вазирлиги маълумотларига кўра, республика ҳудудида йилига ўртача 9—10 минг йўл˗транспорт ҳодисаси содир бўлади, уларнинг икки мингдан ортиғида инсонлар ҳалок бўлмоқда. 2018 йилнинг ўзида Ўзбекистонда 2262 киши ЙТҲ қурбони бўлди. Ҳалок бўлганлар сони 2017 йилга нисбатан 8,5 фоизга камайган бўлсада, бу кўрсаткич ҳамон юқори бўлиб, бир кунда ўртача олти киши ҳалок бўлган.
Таъкидланишича, 2018—2022 йилларда Ўзбекистон Республикасида Йўл ҳаракати хавфсизлигини таъминлаш Концепцияси қабул қилинди. У норматив˗ҳуқуқий базани такомиллаштириш, йўл ҳаракати иштирокчиларининг ҳуқуқий маданиятини оширишни мақсад қилган.
Шундай бўлсада, Ўзбекистон шаҳарлари ва аҳоли яшаш пунктларида автотранспорт ҳаракати тезлигининг 70 дан 60 км/соатга пасайтириш тўғрисидаги таклиф тасдиқланмади. Бу таклиф жамоатчилик муҳокамаси учун жойлаштирилган ҳужжат лойиҳасида билдирилган эди, дейилади «Юксалиш» ҳаракатининг хабарида.
Қайд этилишича, дунёда рухсат этилган энг юқори ҳаракат тезлиги 70 км/соатни ташкил этган мамлакатлар кўп эмас. МДҲнинг қатор давлатлари, Арманистон, Грузия, Озарбайжонда аҳоли яшаш пунктларида рухсат этилган энг юқори ҳаракат тезлиги 60 км/соатни ташкил қилади. Украинада 2019 йилнинг 1 январидан йўлларда ўлим ҳолатлари сонини камайтириш чораларидан бири сифатида максимал ҳаракат тезлиги 60 дан 50 км/соатга камайтирилди. Европанинг 29 та мамлакатида ҳаракатланиш тезлиги 50 км/соат, Лондон шаҳрида эса 48 км/соатни ташкил этади.
Маълумот берилишича, ҳаракат тезлигининг бир фоизга ошиши натижасида, йўл ҳаракати иштирокчилари ўлими билан тугайдиган ЙТҲ эҳтимоли тўрт фоизга, жиддий авария эҳтимоли уч фоизга ортади. Машина уриб кетиши натижасида пиёдаларнинг ҳалок бўлиши эҳтимоли ҳам кескин ортади. 65 км/соат тезликда бундай натижа эҳтимоли 50 км/соат тезликдагига қараганда 4,5 баробар юқори ҳисобланади. 65 км/соат тезликда ҳаракатланганда ёндан берилган зарба натижасида ҳайдовчи ва йўловчиларнинг ҳалок бўлиши эҳтимоли 85 фоизни ташкил этади.
Ўртача тезликни атиги 5 фоизга камайтириш орқали ўлим билан якун топадиган йўл˗транспорт ҳодисаларини деярли 30 фоизга камайтириш мумкин. Қуруқ йўлда 70 км/соат тезликда келаётган ҳайдовчи у ёки бу ҳолатга жавобан манёвр қилиши учун 18—20 метр йўл босиб ўтади, машинани бутунлай тўхтатиш учун эса у 47 метр йўл босиб ўтиши талаб этилади.
Шу сабабли «Юксалиш» умуммиллий ҳаракати жаҳон амалиёти ва Ўзбекистондаги вазиятни комплекс тадқиқ этиш асосида шаҳарлар ва аҳоли яшаш пунктлари йўлларида энг юқори ҳаракат тезлигини 70 км/соатдан 60 км/соатга пасайтириш масаласини илгари суради, дейилади ҳаракат хабарида.
Эслатиб ўтамиз, 9 январь, пайшанба куни соат 23:17 да Тошкентнинг Бунёдкор ва Фурқат кўчалари чорраҳаси яқинида BMW ва Lacetti автомобиллари иштирокида йўл-транспорт ҳодисаси юз берди. ЙТҲ оқибатида икки киши ҳалок бўлди ва машиналар ёниб кетди. BMW ҳайдовчиси воқеа жойидан қочиб кетди. Кейинчалик мазкур ҳайдовчи ушланди ва ЙТҲ вақтида маст бўлганлиги аниқланди.
Изоҳ (0)