Юқоричирчиқ туманида ўтказилган тезкор тадбирда «Йик ота» МФЙда жойлашган автомобилларга газ тўлдириш шохобчасининг ноқонуний фаолияти фош этилди. Бу ҳақда «Дарё»га МИБ матбуот хизмати хабар берди.
Маълум бўлишича, ушбу автомобилларга газ тўлдириш шохобчасида «Ўзстандарт» агентлигининг йилдаги хулосасига кўра, шохобчага ўрнатилган газ ҳисоблаш ускунасининг кўрсаткичларини ўзгартириш мақсадида охирги текширув кунидан, яъни 2019 йилнинг 1 ноябридан 22 ноябрига қадар ҳисоблагичга ташқи аралашув орқали таъсир этиб фойдаланилган.
Ушбу «газ заправка»га ўрнатилган табиий газ жиҳозларининг 1 соатлик газ сарфи 1200 м3/соатига ташкил этиши, ушбу даврда газ ҳисоблагичга ташқи таъсир натижасида жами 604 800 м3 табиий газ сарфланиб, 604 миллион 800 минг сўмлик зарар етказганлиги аниқланган.
Юқоридаги ҳолатда «Ҳудудгаз Тошкент» МЧЖ мансабдор шахслари мансаб ваколатини суиистеъмол қилиб, ўз мансаб ваколатларидан қасддан фойдаланиб, юқоридаги шохобчада ўрнатилган газ ҳисоблаш ускунасидаги юқори кучли «Супервизор» паролини ушбу шохобча мансабдор шахсларига ноқонуний равишда тақдим этилганлиги ёки хабардор қилинганлиги натижасида кўрсаткичларини ўзгартириш мақсадида ташқи таъсир кўрсатиб, жуда кўп миқдорда газ сарфланиб, катта суммада зарар етказгани аниқланган.
Юқоридагиларга кўра, жамият мансабдор шахслари ва бошқаларга нисбатан Жиноят кодексининг 185-2-моддаси (Электр, иссиқлик энергияси, газ, водопроводдан фойдаланиш қоидаларини бузиш) 4-қисми билан, «Ҳудудгаз Тошкент» МЧЖ мансабдор шахсларининг ҳаракатларида эса ҳокимият ёки мансаб ваколатини суиистеъмол қилиш, ўз мансаб ваколатларидан қасддан фойдаланиш жинояти аломатлари мавжудлигини инобатга олиб, Жиноят кодексининг 205-моддаси 2-қисми «а» банди (Ҳокимият ёки мансаб ваколатини суиистеъмол қилиш орқали жуда кўп миқдорда зарар етказиш) билан жиноят иши қўзғатилган.
Изоҳ (0)