Меҳнат вазирлиги тизимида 100 кишини иш билан таъминлаш учун 200 кишининг ставкаси қисқартирилди

«Ягона миллий меҳнат тизими»нинг ходимлар штати Бандликка кўмаклашиш марказларининг 200 нафар ходими лавозимини 0,5 ставкага қисқартириш эвазига шакллантирилган. Бу ҳақда «Ягона миллий меҳнат тизими»ни бошқариш дирекцияси раҳбари Ҳусан Ёрқулов маълум қилди, дея хабар бермоқда «Дарё» мухбири Мусулмонбек Иброҳимов.

Президентнинг « ‘Ягона миллий меҳнат тизими’ идоралараро дастурий-аппарат комплексини жорий қилиш чора-тадбирлари тўғрисида»ги қарорида тизим ходимлари штатини шакллантириш мақсадида Бандлик ва меҳнат муносабатлари вазирлиги марказий аппаратида 16 та, ҳудудларда 84 та — жами 100 та штат бирлиги ташкил этилиши белгиланган.

Маълум қилишларича, «Ягона миллий меҳнат тизими»нинг 100 та штат бирлиги туман (шаҳар) Аҳоли бандлигига кўмаклашиш марказларидаги касбий қайта ўқитишни ташкил этиш шуъбаси мутахассисларининг лавозимини 0,5 ставкага қисқартириш эвазига шакллантирилган.

Дастурий-аппарат комплексига 100 нафардан иборат ходим шакллантирилди. Бунинг учун туман (шаҳар) аҳоли бандлигига кўмаклашиш марказларидаги касбий қайта ўқитишни ташкил этиш шуъбаси 200 нафар ходимининг лавозими 0,5 ставкага қисқартирилди.

Ҳозирда ставкаси қисқартирилган ходимларга қўшимча рағбатлантириш пулларини ажратиш ишлари олиб борилмоқда. Ставкаси қисқартирилган ходимлардан мурожаатлар бўляпти, уларни кўриб чиқяпмиз.

Ҳусан Ёрқулов, «Ягона миллий меҳнат тизими»ни бошқариш дирекцияси раҳбари