Shimoli-g‘arbiy harbiy okrug qo‘shinlari qo‘mondonligi tashabbusi bilan Qoraqalpog‘iston Respublikasining eng olis ovullarida ham vatanparvarlik oyligi doirasidagi tadbirlar o‘tkazib kelinmoqda. Bu haqda “Daryo”ga okrug matbuot xizmati ma’lum qildi.
Harbiy okrug vatanparvarlik karvonining navbatdagi manzili Mo‘ynoq tumani bo‘ldi. Erta tongdan Nukus shahridan safarga otlangan harbiy xizmatchilar aholiga xush kayfiyat ulashish, umumxalq bayramiga aylangan Vatan himoyachilari kuni shukuhini tarqatishni maqsad qildi.
Birinchi manzil Mo‘ynoq tumaniga qarashli eng uzoq joylashgan hududlardan biri — Bo‘zatov ovul fuqarolar yig‘iniga qarashli “Qipchoqdaryo” ovulida joylashgan 10-sonli umumta’lim maktabida bo‘ldi. Mahalliy aholining so‘zlariga qaraganda bu ovulda birinchi marta harbiy vatanparvarlik karvoni mehmon bo‘lmoqda. Ko‘zlarida quvonch bilan harbiylarni qarshi olayotgan otaxon va onaxonlar, harbiy akalariga bo‘lgan qiziqishlarini yoshira olmayotgan bolajonlar mehmonlarni peshvoz kutib oldi.
Okrug qo‘shinlari qo‘mondonining o‘rinbosari, podpolkovnik Nuriddin Qodirov, tuman hokimi Yerpolat Yedenbayev hamda “Nuroniy” jamg‘armasi Mo‘ynoq tumani bo‘limi raisi Janabay Jusimov so‘zga chiqib, yoshlarni vatanparvarlik ruhida tarbiyalash, ularning bandligini ta’minlash hamda aholi o‘rtasida sog‘lom turmush tarzini targ‘ib etishga qaratilgan mana shunday tadbirlarning ahamiyati haqida to‘xtalib o‘tdi. Tuman hokimi tomonidan ushbu ovulga vatanparvarlik karvoni birinchi marta kelgani, mana shunday tadbirlarni kelgusida ko‘proq tashkil etilishi zarur ekanligi ta’kidlandi.
Navbatdagi manzil Mo‘ynoq shaharidagi dehqon bozori bo‘ldi. Uy-ro‘zg‘orni o‘ylab, bozorlik qilib yurgan yurtdoshlarn harbiy orkestr sadolarini o‘zgacha quvonch bilan qarshi oldi.
Keyingi ikki manzilda Favqulodda vaziyatlar vazirligi bo‘linmalari tomonidan Orol dengizi tubidagi suvi qurigan hududlarda “yashil qoplamalar” — himoya o‘rmonzorlari barpo etish hamda Mo‘ynoq tumanidagi obodonlashtirish ishlarida jonbozlik ko‘rsatayotgan harbiy xizmatchilar joylashgan hududlarda ham vatanparvarlik karvoni tomonidan “Mardlik va jasorat” darslari, konsert dasturi va ko‘rgazmali chiqishlar namoyish etildi.
Izoh (0)