Австралияда давом этаётган ўрмон ёнғинлари оқибатида бир миллиарддан ортиқ турли жонзотлар ҳалок бўлди. Бу ҳақда Сидней университетига таяниб, «РИА Новости» хабар берди.
Профессор Крис Дикманнинг ҳисоб-китобларига кўра Янги Жанубий Уэльсда 800 миллиондан ортиқ ҳайвон ҳалок бўлган, бутун мамлакат бўйлаб эса ҳалок бўлган ҳайвонлар сони миллиарддан ошиқ.
Дикман томонидан тақдим этилган рақамлар Халқаро ёввойи табиат фондининг (WWF) 2007 йилдаги Австралия ёввойи табиатига оид ҳисоб-китобига асосланган. Ушбу рақамлардан фойдаланган тадқиқотчилар Янги Жанубий Уэльсдаги сут эмизувчилар, қушлар ва рептилияларнинг ўртача популяция даражасини аниқлаган. Шундан сўнг ўсимликлар майдони бўйича зичлик ҳисоблаб чиқилган.
Тадқиқот ўтказган олимлар консерватив рақамларга таянган, шу сабабли ҳалок бўлган ҳайвонлар сони бундан ҳам кўпроқ бўлиши мумкин.
Австралияда ўрмон ёнғинлари оқибатида миллионлаб гектар ер ёниб кетди, сўнгги ой давомида 17 киши ҳалок бўлган, минглаб уйлар кулга айланган.
Изоҳ (0)