Бухорода Навоий кон-металлургия комбинати ишчиларини олиб кетаётган автобус Nexia билан тўқнашгани ва оқибатда икки киши ҳалок бўлгани ҳақида хабар берилган эди. Ўзбекистон ИИВ ҳузуридаги Тергов департаменти мазкур ЙТҲ бўйича маълумот берди.
Маълум қилинишича, Бухоро вилояти Ғиждувон тумани Зафаробод қўрғони ҳудудидан ўтувчи «Навоий—Зарафшон» А-379 автомобиль йўлида 2020 йил 5 январь куни тахминан соат 06:45 да йўл-транспорт ҳодисаси юз берган.
46 ёшли А.Н. бошқарувидаги Nexia автомашинасида меъёридан ортиқча йўловчи бўлган. Жами 5 нафар йўловчи билан бирга Конимех тумани Зафаробод шаҳарчаси томон ҳаракатланиб кетаётган Nexia йўлнинг 60-километрига етганида ҳайдовчи бошқарувни йўқотиб, ўзига нисбатан қарама-қарши йўналишда ҳаракатланиб келаётган 50 ёшли У.Х. бошқарувидаги Навоий кон металлургия комбинатига тегишли Isuzu русумли автобус билан юзма-юз тўқнашиб, йўл-транспорт ҳодисаси содир қилган.
ЙТҲ оқибатида Nexia йўловчиси, 58 ёшли М.А. тан жароҳати олиб, ҳодиса жойида вафот этган, енгил автомашинанинг ва автобуснинг қолган йўловчилари тиббиёт бирлашмасига мурожаат қилган. Nexia’нинг бошқа йўловчиси, 29 ёшли Т.М. кўрсатилган тиббий муолажаларга қарамасдан шифохонада вафот этган. Nexia автомашинаси ичида бўлган яна бир йўловчи оғир аҳволда, автобусдаги 4 нафар йўловчи турли даражадаги тан жароҳатлари билан шифохонага ётқизилган.
Мазкур ҳолат юзасидан Бухоро вилояти ИИБ томонидан Ўзбекистон Республикаси Жиноят кодексининг 266-моддаси 3-қисми (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Изоҳ (0)