«Рома» клубининг собиқ ярим ҳимоячиси Даниэле де Росси «Бока Хуниорс»ни тарк этиши ва футболчилик фаолиятига якун ясашини маълум қилди.
«Гап жароҳат ёки бирор жиддий муаммода эмас. Мен шунчаки оилам ёнига қайтишим кераклигини ҳис қилмоқдаман. Айниқса қизимни соғиняпман, у ҳам мени жуда соғинган. Мен шу қарорга келдим, уни ўзгартирмайман.
Барча мени бу йўлдан қайтаришга уринди, шу ерда кўпроқ қолишни таклиф қилди. Бироқ қарор қабул қилиб бўлдим, бу ерда қалбимнинг бир бўлагини қолдираман. Чунки ҳеч ким «Бомбонере»да ўйнаш ва «Бока Хуниорс» кийиниш хонасида бўлиш қандайлигини тушуна олмайди. Бу мен учун ажойиб тажриба бўлди.
Мен футболчилик фаолиятимни якунлайман. Бироқ, футбол соҳасида ишлашда давом этаман», — дейди де Росси.
Маълумот учун, де Росси 2000—2009 йиллар мобайнида «Рома» клуби тизимида фаолият юритган. 36 ёшли футболчи римликлар билан Италия Кубоги ва Суперкубогида зафар қучган. Де Росси «бўрилар» сафида жами 616 та ўйин ўтказган ва бу борада Франческо Тоттидан кейинги ўринда туради. Шунингдек, футболчи 2006 йилги Жаҳон Чемпионатида Италия терма жамоаси билан ғолибликни қўлга киритган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)