Шу йил 5 январь куни соат 06:40 атрофида Навоий вилояти, Конимех тумани, Навоий—Зарафшон трассасининг 61-километрида Nexia русумли автомобиль Навоий кон-металлургия комбинати ишчи-ходимларини олиб кетаётган Isuzu автобуси билан тўқнашди. Бу ҳақда Соғлиқни сақлаш вазирлиги матбуот хизмати хабар бермоқда.
Йўл транспорт ҳодисаси иштирокчисига айланган 19 нафар фуқародан 10 нафарининг аҳволи яхши бўлганли боис уйига жавоб берилган.
Ушбу автоҳалокат натижасида икки киши — Томди тумандан 58 ёшли А.М. ва Конимех туманидан М.У. олган тан жароҳатлари оқибатида вафот этди. 8 нафар фуқаро эса Конимех тумани, Зафаробод посёлкасидаги Навоий кон-металлургия комбинатига қарашли 5-сонли тиббий санитария қисмига тез тиббий ёрдам бригадаси ёрдамида олиб келинди.
Соғлиқни сақлаш вазирлиги томонидан мазкур тиббий санитария қисмига Республика шошилинч тиббий ёрдам илмий маркази Навоий вилояти филиалидан малакали нейрохирург ва травматолог мутахассислар санитар авиацияси орқали жўнатилди.
Жароҳатланганлар — Томди туманидан 18 ёшли А.А., 46 ёшли А.Н. ва 20 ёшли А.К., Конимех туманидан 14 ёшли А.Ж., 41 ёшли А.Ж. ва 56 ёшли Б.К., Зафаробод посёлкасидан 20 ёшли Н.С. ҳамда 27 ёшли С.Ш. зудлик билан текширувлардан ўтказилиб, белгиланган тартибда шошилинч тиббий ёрдам кўрсатилди. Улардан биттасининг аҳволи оғир, учтасининг аҳволи эса эса ўртача оғирликда, қолган тўрт нафарининг аҳволи қониқарли даражада.
«Айни пайтда уларнинг аҳволи малакали шифокорлар назоратида бўлиб, стандартлар асосида тиббий ёрдам кўрсатилмокда», — дейилади хабарда.
Изоҳ (0)