Қашқадарёлик ҳайдовчи ЙПХ ходимининг боди-камераси ишлаётганига ишонмади ва ходимга қаршилик кўрсатди

Telegram каналларида ЙПХ ходимининг боди-камераси ишламаётгани айтилган ва бунга эътироз билдираётган ҳайдовчилар тасвирланган видео тарқалди.

Қашқадарё ИИБ ахборот хизматининг ёзишича, мазкур воқеа жорий йилнинг 3 январь куни Косон тумани ҳудудида содир бўлган.

Маълум бўлишича, 2020 йил 3 январь куни вилоят ИИБ ЙҲХБ ЙПХБ 3-ЙПХ отряди 2-сафарбарлик гуруҳи ЙПХ инспекторлари кичик сержант М.Баҳриддинов ва сафдор Ж.Равшановлар Косон туман «Маъшал» маҳалласи ҳудудида жойлашган Педагогика коллежи рўпарасида хизмат вазифасини олиб бораётган пайт Spark автомобили ҳайдовчиси шу йўлда ўрнатилган 5.12 (Автобус ва (ёки) троллебус тўхташ жойи) йўл белгиси таъсир майдонида тўхтаганлиги ва хавфсизлик камарини тақмасдан ҳаракатланиб келганлиги учун тўхтатилган. Кичик сержант М.Баҳриддинов автомашина ҳайдовчисини тўхтатгач ҳайдовчига ўзини таништириб, содир этган қоидабузарлиги бўйича батафсил тушунтириш берган. Ҳайдовчидан тегишли тартибда ҳужжатларини талаб қилиб олиб, ҳужжатларини текшириш давомида ҳайдовчининг автомашина бошқариш учун талони йўқлигини аниқлаб, унга нисбатан содир этган қоидабузарлиги юзасидан маъмурий баённома расмийлаштирмоқчи бўлганда, ҳайдовчи Р.Каримов ЙПХ инспекторига видеокамераси ишламаётганлигини рўкач қилиб, маъмурий баённома расмийлаштиришига қаршилик кўрсатган.

— ЙПХ инспектори фуқаро Р.Каримовга видеокамера ишламаса тақиб юрмаслигини тушунтиришига қарамасдан уни қўл телефонига видеотасвирга олиб жанжал чиқаришга ва оммани йиғишга ҳаракат қилган, — дейилади ИИБ ахборот хизмати тарқатган маълумотда. — ЙПХ инспектори вазиятни тўғри баҳолаган ҳолда вазминлик билан вазиятдан чиқишга ҳаракат қилган ва ҳайдовчи Р.Каримовга содир этган қоидабузарлиги бўйича маъмурий баённома расмийлаштириб ҳайдовчига ушбу маъмурий баённомани таништирганида ҳайдовчи маъмурий баённома билан танишиб имзо чекиб «танишдим» — деб изоҳ ёзиб берган, шундан сўнг маъмурий баённома ва транспорт воситасини кўздан кечириш ҳақидаги далолатнома тузилиб, автомашина жарима майдонига жойлаштирилган.

ИИБ ахборот хизматига кўра, фуқаро Р.Каримов гўёки ЙПХ инспекторлари ишламайдиган видеокамера билан ишга чиқишганлигини, 2020 йил 1 январь кунидан видеокамераси йўқ ЙПХ инспекторлари автомашина тўхтатишга ва маъмурий баённома расмийлаштиришга ҳаққи йўқлигини тарғиб қилган ҳолда ўзи томонидан қўл телефонига туширилган видеони ижтимоий тармоқларга жойлаштирган.

Айтилишича, мазкур ҳолат юзасидан ЙҲХБ масъул ходимлари томонидан хизмат текшируви ўтказилмоқда.