Сурхондарёда Сайлов кодекси талаблари бузилгани рад этилганди. Аммо раддиядаги фактлар ишонарли эмас

Сурхондарёдаги сайлов участкаларининг бирида Сайлов кодекси талаблари бузилгани аниқлангани хабар берилган эди. «Diyor24.uz» нашрида шу масала юзасидан 17 декабрь куни «Сайлов ва монополия» сарлавҳали материал эълон қилинганди. 78-Термиз сайлов округ комиссияси раддия билан чиқиб, ҳудудда Сайлов кодекси талаблари бузилганини рад этган.

Бироқ «Diyor24.uz» нашрининг ёзишича, уларда мавжуд аудио ва видеоматериаллар мазкур жавобнинг тўғрилигига шубҳа уйғотади. Қайд этилишича, «Сайлов ва монополия» сарлавҳали материалга жойлаштирилган фотосуратлар 17 декабрда участка сайлов комиссияси биносидан олинган.

Шунингдек, нашр журналисти 16 декабрь куни соат 18:47 да 260-сайлов участка комиссияси раиси Зуҳриддин Расулов билан телефон орқали суҳбатлашгани, нашрда 22 декабрь сайлов кунида ҳам 260-сайлов участкасида Зуҳриддин Расулов комиссия раиси мандати (бейжик)ни тақиб ишлаётганини тасдиқловчи ҳамда унинг интервьюси олинган видеоматериал ҳам мавжудлиги айтилмоқда.

Қайд этилишича, ушбу интервьюда Зуҳриддин Расулов комиссия таркиби ўзгартирилгани айтган, лекин журналистларга янги таркиб рўйхатини кўрсата олмаган. 260-участка сайлов комиссиясининг янги раисиман, деб ўзини таништирган Термиз шаҳри 8-сон мактабгача таълим ташкилоти мудираси Муниса Орипова эса мандатсиз ишлаётганини тан олган.

«Қизиқ, 78-Термиз сайлов округи маълум қилганидек, 14 декабрда комиссия янгиланган бўлса, нега сайлов кунигача (орада 8 кун бор) Зуҳриддин Расуловдан мандат олиб қўйилмади? Ёки комиссиянинг янги раисига мандат (бейжик) берилмади? Берилган тақдирда,аввалги раисда ҳам янги раисда ҳам мандат бўлиши кулгили-ку!

78-Термиз сайлов округи ўз изоҳида 260-участка сайлов комиссияси таркиби ўзгартирилганини, 8-мактаб ўқитувчилари чиқарилганига муносабат билдирган-у бироқ негадир депутатликка яна бир номзод ‘Турон’ маҳалла фуқаролар йиғини раисига бевосита бўйсунувчи ходимларнинг участка сайлов комиссияси таркибидаги фаолияти ҳақида лом-мим демаган», — дейилади хабарда.