Ўзбекистон Олий Мажлиси Қонунчилик палатаси депутатлигига номзодлар учун такрорий овоз бериш 5 январь, якшанба куни бўлиб ўтади. Бу ҳақда Ўзбекистон парламент сайловларини ёритиш бўйича Халқаро матбуот маркази эслатди.
22 декабрь куни бўлиб ўтган сайлов якунларига кўра, 22 та сайлов округида бирорта ҳам номзод берилган овозларнинг ярмидан кўпини тўплай олмаган, учта сайлов округида эса сайлов натижаларини аниқлашда арифметик хатога йўл қўйилгани боис энг кўп овоз олган икки номзод иккинчи турга қолган эди.
Марказий сайлов комиссиясининг қарорига кўра, Ўзбекистон бўйича 25 та сайлов округида сайловчилар овоз бериш учун келишлари кутилмоқда. Такрорий овоз бериш бўлиб ўтадиган округлар рўйхати ва депутатликка номзодлар тўғрисидаги маълумотлар Марказий сайлов комиссиясининг веб-сайтида эълон қилинган.
Сайлов кодексининг 59-моддасига биноан, Қонунчилик палатаси ва маҳаллий Кенгашлар депутатлари сайловида сайлов округи бўйича икки нафардан ортиқ номзод қўйилган бўлса-ю, улардан ҳеч бири сайланмаса, округ сайлов комиссияси энг кўп овоз олган икки нафар номзод бўйича округда такрорий овоз бериш ўтказилади.
Такрорий сайлов куни халқаро матбуот марказида Марказий сайлов комиссияси раиси Мирзо-Улуғбек Абдусаломов, бош прокурор Ниғматилла Йўлдошев ва Олий суд раиси Козимжон Комилов иштирокида анжуманлар ташкил этилиши кутилмоқда.
Маълумот учун:
Сайловнинг 22 декабрь куни бўлиб ўтган биринчи тури якунларига кўра,
- ЎзЛиДеПдан — 42 нафар,
- «Миллий тикланиш» партиясидан — 34 нафар,
- «Адолат» партиясидан — 20 нафар,
- Халқ демократик партиясидан — 18 нафар,
- Ўзбекистон Экологик партиясидан — 11 нафар депутат сайланган.
Изоҳ (0)