Сурхондарё вилояти Денов туманидан ўтувчи йўлда тракторни қувиб ўтишга уринган «УАЗ» билан тўқнашмаслик учун рулни бошқа тарафга буриб, йўл четига ағдарилган «ВАЗ-2107» автомобининг ҳайдовчиси ва унинг ичида бўлган йўловчи ҳалок бўлди. Бу ҳақда ИИВ ЙҲХББ ахборот хизмати хабар берди.
29 декабрь куни 18:30 ларда «Мангузар—Жарқўрғон—Бандихон—Олтинсой—Денов» автомобиль йўлининг 167-километрида 26 ёшли М.А. «УАЗ» русумли автомобилини бошқараётиб, шу йўналиш бўйлаб олдинда ҳаракатланиб кетаётган тракторни қувиб ўтиш учун йўлнинг қарама-қарши ҳаракат бўлагига чиққан. Шунда машина ортилган юкнинг оғирлиги сабабли ағдарилиб кетган.
Шу йўналиш бўйлаб қарама-қарши томондан ҳаракатланиб келаётган 20 ёшли Т.Ш. ўз бошқарувидаги «ВАЗ-2107» русумли автомобилини «УАЗ» автомобили билан тўқнашувини олдини олиш мақсадида рулни ўнга бурган вақтида, автомобиль бошқарувни йўқотиб йўл четига ағдарилган.
Шунингдек, ушбу йўналишда ҳаракатланиб келаётган 19 ёшли Т.Ш. бошқарувидаги Nexia-3 русумли автомобили «УАЗ» автомобили билан тўқнашган.
Оқибатда «ВАЗ-2107» автомобили ҳайдовчиси Т.Ш. ва 21 ёшли йўловчи воқеа жойида ҳалок бўлган. Автомобильнинг бошқа йўловчилари Денов туманида яшовчи, 1990 йилда туғилган Х.Ф. ва 1997 йилда туғилган Ж.Ж. турли даражадаги тан жароҳатлари олиб касалхонага ётқизилган.
Изоҳ (0)